Rai 1 իտալական հեռուստաալիքի TG1 լրատվական հաղորդումն անդրադարձել է Հայոց ցեղասպանության 100-ամյա տարելիցի կապակցությամբ Վատիկանի Սբ Պետրոսի տաճարում Հռոմի Ֆրանցիսկոս պապի մատուցած պատարագին և դրա ընթացքում նրա հայտարարությանը՝ խոսելով դրանց կարևորության մասին:
Հաղորդավարը նշել է, որ Անկարան երբեք չի ցանկացել 1915-ի դեպքերը «ցեղասպանություն» ճանաչել:
««20-րդ դարի առաջին ցեղասպանություն»՝ կարևոր բառեր, որոնք արտասանել է Ֆրանցիսկոս պապը, քանի որ Թուրքիան շարունակում է ժխտել, որ մեկ դար առաջ տեղի ունեցած իրադարձությունները ցեղասպանություն են եղել»,- ասում է լրագրողը ռեպորտաժում:
Լրատվականը նաև նշել է, որ Հռոմի պապը կոչ է արել երկու ժողովուրդներին հաշտեցման ուղին բռնել:
Լրատվականը ներկայացրել է Հայոց ցեղասպանությունը, նշել, որ այն մոդել է ծառայել Հիտլերի համար, ով 1939 թվականին իր ելույթում ասել է. «Ո՞վ է, ի վերջո, այսօր հիշում հայերի բնաջնջման մասին»: Ռեպորտաժն անդրադարձել է նաև Հայաստանի Հանրապետության Նախագահ Սերժ Սարգսյանի՝ Իտալիա պաշտոնական այցին:
«Չճանաչված ցեղասպանությունը մարդկության ապագայի համար վտանգ է»,- ասել է Հայաստանի Հանրապետության Նախագահը լրատվականին տված հարցազրույցում:
«Ցեղասպանությունը ճանաչել՝ նշանակում է ազատվել պատմության բեռից»,- ասել է ՀՀ Նախագահը՝ հավելելով նաև, որ այն, ինչ այս օրերին տեղի է ունենում Միջին Արևելքում կրոնական փոքրամասնությունների հանդեպ, նույնպես ցեղասպանություն է:
