Ուկրաինայի հումանիտար իրավիճակը լրջորեն վատացել է, երեքշաբթի ասել է ՄԱԿ–ի գլխավոր քարտուղարի պաշտոնական ներկայացուցիչ Ստեֆան Դյուժարիկը, հաղորդում է ՌԻԱ Նովոստին։
«Ուկրաինայի իրավիճակը սխալ ուղղությամբ է զարգանում», – ասել է նա` նշելով, որ հումանիտար իրավիճակն «աղետալի է»։
Նրա խոսքով` խոսքը «770 հազար փախստականների մասին է, և դա մի երկրում, որտեղ մոտ մեկ տարի առաջ ընդհանրապես փախստականներ չկային»։
Դյուժարիկը ուշադրություն է հրավիրել այն փաստին, որ «կառավարության վերահսկողության տակ չգտնվող տարածքներում բնակվող մարդիկ ոչ բավարար հասանելիություն ունեն պարենի նկատմամբ»։ Նրա խոսքով` իրավիճակն «ավելի անելանելի է դառնում»։
«Սա հիշեցում է հակամարտության մեջ ներգրավված բոլոր քաղաքական առաջնորդներին այն մասին, որ նրանք պետք է նստեն բանակցությունների սեղանի շուրջ և վերացնեն առկա հակասությունները», – ասել է Դյուժարիկը։
Ուկրաինայի իշխանությունները նախորդ տարվա ապրիլին Դոնբասում ուժային գործողություններ էին սկսել պետական հեղաշրջումից դժգոհ բնակիչների դեմ։ ՄԱԿ–ի վերջին տվյալներով` հակամարտության հետևանքով զոհվել է ավելի քան 6 հազար մարդ։