Ներգաղթյալների մասին հայտարարություններով ամերիկաբնակ թուրքերի համակրանքին արժանացած Նյու Յորքի քաղաքապետ Բիլ դե Բլազիոն Հայոց ցեղասպանությանը նվիրված ապրիլքսանչորսյան ուղերձից հետո թուրքերի հիասթափության պատճառ է դարձել, գրում է ամերիկաբնակ թուրքերին պատկանող TurkishNY կայքը։
ԱՄՆ-ում բնակվող թուրքերի ամենամեծ համայնքներից մեկը բնակվում է Նյու Յորքում, և նրանց վիրավորել է «1915-ի դեպքերի» կապակցությամբ քաղաքապետի «մեղադրող» հայտարարությունը։
Իր ուղերձում քաղաքապետը հայերի զանգվածային սպանությունները «ցեղասպանություն» էր որակել և նշել էր, որ դա 20-րդ դարի ամենամեծ վայրագություններից մեկն է։
Նա հայտարարել էր, որ Ցեղասպանության ժխտումը ողջ աշխարհում և Նյու Յորքում բնակվող հայերի ցավն ավելի է մեծացնում և հիշեցրել էր, որ Հռոմի Ֆրանցիսկոս պապը ևս ճանաչել է ցեղասպանությունը։
