Վրաստանի պաշտպանության նոր նախարարն առաջին անգամ կարող է դառնալ կին թեկնածուն` խորհրդարանի պատգամավոր Թինա Խիդաշելին: Այս մասին հաղորդում է INTERFAX.RU-ն` վկայակոչելով վրացական ԶԼՄ-ները:
Խիդաշելին ինքը չի հաստատել և չի էլ հերքել տվյալ տեղեկությունը: «Վաղն առավոտյան վարչապետն ամեն ինչ կասի», - հինգշաբթի լրագրողներին հայտարարել է վերջինս:
Վրաստանի Զինված ուժերի գլխավոր շտաբի ղեկավար Վախթանգ Կապանաձեն ևս անորոշ է պատասխանել հարցին` արդյո՞ք հրաժարական է տալիս պաշտպանության ներկայիս նախարար Մինդիյա Ջանելիձեն:
Հիշեցնենք, որ նախօրեին երիտասարդության և սպորտի հարցերով նախարար Լևան Կիպիանին հրաժարական է ներկայացրել, ինչն էլ բավարար պատճառ է հանդիսացել, որ խորհրդարանը կառավարության նկատմամբ վստահության հարց բարձրացնի, քանի որ դա ներկայիս նախարարական կազմից 7-րդ նախարարի հրաժարականի դեպքն էր:
