«Նորավանք» հիմնադրամը Աշխատանքի և սոցիալական հարցերի նախարարությունից պատվեր է ստացել՝ կատարել գիտական ուսումնասիրություններ և եզրահանգումներ՝ պարզելու դեմոգրաֆիական իրադրության բարելավման հնարավորությունները Հայաստանում։
Այսօր հրավիրված ասուլիսին հիմնադրամի տնօրեն Գագիկ Հարությունյանը ներկայացրեց արդյունքները և շեշտեց՝ իրենց հիմնադրամը նորարարական լուծումներ է առաջարկում։
«Մենք առաջարկում ենք կառավարությանը կից ստեղծել խորհուրդ, որը կզբաղվի, ոչ թե ինֆորմացիոն տեխնոլոգիաների զարգացմամբ, որն արդեն կա և բավական արդյունավետ աշխատում է, այլ կոնկրետ այնպիսի ոլորտներով, ինչպիսին է տեխնոլոգիան ոլորտը՝ փոքր քիմիա, կենսաբանություն, լազերային ֆիզիկա, ռադիոֆիզիկա, որտեղ ստեղծվում է ոչ թե վիրտուալ, ծրագրային պրոդուկտ, այլ պրոդուկտ, որը կարելի է շոշափել»,-ասաց հիմնադրամի խորհրդական Սամվել Մանուկյանը:
Նա նկատեց, թե այստեղ կա մի նրբություն, որ ինֆորմացիոն տեխնոլոգիաներում աշխատողները շատ մոբիլ են և երկրից հեշտությամբ գնում են։
«Նրանց անհրաժեշտ է մի համակարգիչ, մի ծրագրային համակարգ, որը դրված է համակարգչում և նրանք արագորեն կարող են այստեղից գնալ, որը և տեղի է ունենում ինֆորմացիոն տեխնոլոգիաների ոլորտում»,-ասաց նա։
Նա նկատեց, թե այստեղ կա երկու հիմնական խնդիր։
«Առաջինը, երբ որ մենք ասում ենք, որ այդ ոլորտում աշխատում է 11 հազար մարդ, սա մի փոքր մոլորության մեջ կարող է գցել մեզ, քանի որ դրանց մեջ մտնում են 5 կազմակերպություններ, ինչպիսիք են՝ «Արմենթելը», «Օրանժը», «Վիվասելը», «Յուքոմը»։ Եթե նրանց աշխատակիցների քանակը հանում ենք, արդեն բուն ՏՏ ոլորտի մասնագետների թիվը կրճատվում է մի քանի հազարով, այսինքն՝ այստեղ շուրջ 5-6 հազարի մասին է խոսքը»,-ասաց նա։
Մինչդեռ շոշափելի արդյունք ապահովողները, ըստ նրա, ավելի հակված են մնալ։
