Լատինական Ամերիկայում Հայ կաթողիկե եկեղեցու առաջնորդ, գերապայծառ Վարդան արքեպիսկոպոս Պողոսյանը Չիլիի հայ համայնքին և բնակիչներին հրավիրում է կիրակի ներկա գտնվելու Սանտյագոյի եկեղեցում մատուցվելիք պատարագին, որը նվիրված է լինելու Հայոց ցեղասպանության զոհերի հիշատակին:
«Ցանկանում եմ Չիլիի բնակիչներին հրավիրել մասնակցելու պատարագին և տեղեկանալու 20-րդ դարի ամենամեծ ողբերգության մասին, որի հետևանքները շարունակվում են մինչ օրս, և որը, ինչպես բնորոշեց Ֆրանցիսկոս պապը, մարդկության դեմ կատարված հանցագործություն է», - noticias.iglesia.cl պարբերականի փոխանցմամբ` հայտարարել է արքեպիսկոպոս Պողոսյանը:
75-ամյա հոգևորականը Լատինական Ամերիկայի, այսինքն` Չիլիի, Արգենտինայի, Բրազիլիայի, Ուրուգվայի, Վենեսուելայի և Մեքսիկայի հայ կաթոլիկ համայնքների առաջնորդն է:
«Թեև հայերը ատելություն չեն պահպանում թուրքերի հանդեպ, պաշտոնական Թուրքիայից արդարություն ենք պահանջում, քանի որ սերն ու ներողամտությունն առանց արդարության չեն կարող գոյատևել», - հավելել է հոգևոր առաջնորդը:
