Չինաստանը պատրաստ է սեփական միջազգային վճարային համակարգի ստեղծմանը: Նոր համակարգը ոչ միայն կամրապնդի յուանի դերը միջազգային ֆինանսական շուկաներում, այլ նաև կթուլացնի ամերիկյան վճարային համակարգերից կախվածության աստիճանը, ինչը մեծապես կարող է խանգարել Չինաստանին ԱՄՆ-ի հետ կոնֆլիկտի դեպքում:
Reuters գործակալությունը հայտնում է՝ հղում անելով Չինաստանի երեք անհայտ աղբյուրներին, որ չինական Միջազգային վճարային համակարգի (CIPS) գործարկումը նախատեսված է սկսել սեպտեմբեր-հոկտեմբեր ամիսներին: CIPS-ը կփոխարինի ներկայումս գոյություն ունեցող վճարային համակարգերին և մեծապես կհեշտացնի ամբողջ աշխարհում յուանով վճարումներ կատարելու գործընթացը: Մասնագետները պնդում են, որ նոր վճարային համակարգը կնպաստի, որպեսզի յուանը դառնա կշիռ ունեցող արժույթ համաշխարհային ֆինանսական շուկայում:
«CIPS -ն արդեն պատրաստ է,- հայտնում է բարձրաստիճան չինացի բանկիրը, ով չի ցանկացել հայտնել իր անունը -, այն փորձարկվելու է 20 բանկերում, որոնք արդեն ընտրված են: 13 -ը չինական բանկեր են, 7 -ը՝ արտասահմանյան խոշոր բանկերի մասնաճյուղեր: Պաշտոնական գործարկումը կլինի սեպտեմբեր-հոկտեմբեր ամիսներին: Ամսաթիվը կախված է փորձարկումների արդյունքներից»,- եզրափակել է բանկիրը:
Եթե փորձարկումները չընթանան այնպես, ինչպես նախատեսում է Չինաստանի ֆինանսների նախարարությունը, ապա որոշ ժամանակ կպահանջվի վճարային համակարգի թերությունները շտկելու համար: Ամեն դեպքում, Պեկինում ցանկություն կա վճարային համակարգը գործարկել այս տարի:
Սեփական վճարային համակարգ ստեղծելու համար Չինաստանին անհրաժեշտ է եղել երեք տարի: People's Bank of China-ն հայտնում է, որ CIPS-ի ստեղծման համար աշխատանքներ են տարվում 2012-ի ապրիլից:
Վերջին տարիներին Չինաստանը կտրուկ արագացրել է իր արժույթի միջազգայնացման համար տարվող աշխատանքները: Չինաստանի ԿԲ-ն դեռ անցյալ տարի քլիրինգային բանկերի թիվը հասցրել է մինչև 14-ի: SWIFT-ի տվյալներով յուանը մտել է միջազգային արժույթների հնգյակի մեջ 2014-ի նոյեմբերին՝ դուրս մղելով կանադական և ավստրալիական դոլարները:
Դեկտեմբերին յուանով վճարումներն աճել են ՝ նախորդ տարվա նույն ժամանակահատվածի նկատմամբ 20,3%-ով:
