Կառավարությունը կարևորում է բանկային ավանդների հատուցման չափերի բարձրացումը, քանի որ այն կնպաստի բանկային համակարգի հանդեպ ավանդատուների վստահության ամրապնդմանը:
Կառավարության նիստում այսօր ՀՀ ֆինանսների փոխնախարար Պավել Սաֆարյանը նշել է, որ Ազգային ժողովի պատգամավորներ Միքայել Մելքումյանը, Նաիրա Զոհրաբյանն ու Էլինար Վարդանյանը հանդես են եկել օրենսդրական նախաձեռնությամբ ու կառավարությանն առաջարկել փոփոխություն կատարել «Ֆիզիկական անձանց բանկային ավանդների հատուցումը երաշխավորելու մասին» ՀՀ օրենքում փոփոխություն կատարելու մասին» օրենքում:
Նախագծով առաջարկվում է, որ կկրկնապատկվեն օրենքով սահմանված և ներկայումս գործող՝ երաշխավորված բանկային ավանդի հատուցման չափերը (4 մլն դրամ միայն դրամային ավանդ ունենալու դեպքում և 2 մլն դրամ միայն արտարժութային ավանդ ունենալու դեպքում):
Բացի այդ, առաջարկվում է հատուցում նախատեսել նաև արտարժույթային ավանդի մասով այն դեպքում, երբ ավանդատուն բանկում ունի և՛ դրամային, և՛ արտարժույթային ավանդ, իսկ դրամային ավանդի գումարը 4 մլն դրամից ավելի է՝ ութ միլիոն դրամի և հատուցված դրամային բանկային ավանդի տարբերության չափով:
«Կառավարությունը կողմ է առաջարկին, սակայն գտնում է, որ բանկային ավանդների հատուցման փոփոխվող չափերը լրացուցիչ քննարկման կարիք ունեն»,- ասաց Սաֆարյանը` ավելացնելով, որ կառավարությունն առաջարկում է երաշխավորված բանկային ավանդի հատուցման չափերը դրամային ավանդի դեպքում սահմանել 10 մլն դրամ և 5 մլն դրամ` միայն արտարժութային ավանդ ունենալու դեպքում:
Գործադիրն օրենսդրական նախաձեռնությանը հավանություն տվեց: Նախագիծն ԱԺ-ում քննարկելիս հարակից զեկուցմամբ հանդես կգա ՀՀ ԿԲ նախագահի տեղակալ Ներսես Երիցյանը:
