Այսօր «Թատրոն 32»-ում տեղի ունեցավ արվեստի մի քանի ոլորտներ միաժամանակ ընդգրկող, «Մեկ տանիքի ներքո» խորագրով «Արտ-ֆեստ» երիտասարդական հանրապետական երկրորդ բաց փառատոնի մրցանակաբաշխության հանդիսավոր արարողությունը, որը նվիրված էր ՀՀ արվեստի վաստակավոր գործիչ, ռեժիսոր, «Արտ ֆեստ» փառատոնի հիմնադիր` Արմեն Մազմանյանի հիշատակին:
Փառատոնի հիմնադիր տնօրեն Էրիկ Բարսեղյանը ողջունեց ներկաներին, և շնորհակալություն հայտնելով փառատոնի մասնակիցներին և բոլոր աջակիցներին, նշեց, որ փառատոնին ակտիվորեն մասնակցել են մարզային ստեղծագործական միավորումներն ու անհատ ստեղծագործողները: Եղել է հայտերի աննախադեպ լիություն` 155 հայտ, ավելի քան 200 մասնակից, որոնցից էլ այսօր ընտրվել և մրցանակների են արժանացնել լավագույնները:
Փառատոնի տնօրեն Էրիկ Բարսեղյանը հույս հայտնեց, որ հաջորդ տարի փառատոնը կդառնա համահայկական, որովհետև, նրա խոսքով, սփյուռքի կողմից ակտիվ արձագանքներ են եղել:
«Թատերական արվեստ»-ի շրջանակում ապրիլի 23-ից մայիսի 22-ն ընկած ժամանակահատվածում ԵԹԿՊԻ ուսումնական թատրոնում, Հովհ. Թումանյանի անվան պետական տիկնիկային թատրոնում, Հայաստանի թատերական գործիչների միությունում, Պետական երաժշտական կամերային թատրոնում, ինչպես նաև «Թատրոն 32»-ում ցուցադրվել են 25 ներկայացումներ:
Փառատոնի «Կինոարվեստ» խորագրով ցուցադրությունները մայիսի 19-21-ը ներկայացվել են «Նարեկացի» արվեստի միությունում:
«Կերպարվեստ» անվանակարգում գեղանկարչության, քանդակագործության, գրաֆիկայի, լուսանկարչության ցուցադրություններն այցելուներին մայիսի 21-ին՝ եղանակային փոփոխությունների պատճառով ներկայացվել են Կոմիտասի անվան կամերային երաժշտության տանը :
Ստեղծագործությունների ցուցադրություններից հետո, մասնագիտական հանձնախումբը, որը բաղկացած է եղել պրոֆեսիոնալ մասնագետներից, ընտրել է լավագույն ստեղծագործությունները, որոնք էլ այսօր արժանացան բրոնզե, արծաթե և ոսկե մրցանակների:
«Պարույր Սևակ» ներկայացումով ոսկե մրցանակին արժանացած Կարեն Բաբաջանյանը շնորհակալություն հայտնելով փառատոնի կազմակերպիչներին, նշեց, որ դա իր առաջին մրցանակն է, որը շատ պարտավորեցնող է: Նա հույս հայտնեց, որ փառատոնը հաջորդ տարի ավելի մեծ ձեռքբերումներ ու հաջողություններ կունենա, քանի որ այն շատ կարևոր և գեղեցիկ միջոցառում է երիտասարդ արվեստագետների համար:
ԵԹԿՊԻ ռեկտորի ժամանակավոր պաշտոնակատար, ՀՀ արվեստի վաստակավոր գործիչ, կինոգետ Դավիթ Մուրադյանը «Արտ ֆեստ» փառատոնի մրցանակաբաշխության հանդիսավոր արարողության ժամանակ շնորհակալություն հայտնեց փառատոնի բոլոր մասնակիցներին և նշեց, որ արվեստը նորանում է նոր անունների շնորհիվ: Նա շեշտեց, որ կարևոր է տեսնել սերնդի դիմանկարը, կարևոր է նաև այդ սերնդի մեջ տեսնել անհատականությունների, և հենց այս փառատոնի շնորհիվ հնարավոր եղավ տեսնել հետաքրքիր լուծումներ ստացած ստեղծագործություններ և բացահայտել նոր անուններ:
Փառատոնի հիմնադիր տնօրեն Էրիկ Բարսեղյանը հատուկ շնորհակալագրեր հանձնեց Երևանի քաղաքապետ Տարոն Մարգարյանին, ՀՀ մշակույթի նախարար Հասմիկ Պողոսյանին և շնորհակալություն հայտնեց «Արտ-ֆեստ» երիտասարդական հանրապետական երկրորդ բաց փառատոնի ինֆորացիոն գործընկերներին:
Հիշեցնենք, որ Երկրորդ «Արտ-ֆեստ»-ի մեկնարկը տրվել էր մայիսի 10-ին:
«Արտ-ֆեստ»-ն իր գործունեությունն սկսել է 2013 թվականին: Փառատոնի հիմնադիրն է ռեժիսոր, ՀՀ արվեստի վաստակավոր գործիչ, ԵԿԹՊ-ի նախկին ռեկտոր Արմեն Մազմանյանը, ում հիշատակին էլ այս տարի նվիրված էր «Արտ-ֆեստ»-ը: Փառատոնը ներկայացուցչական մրցութային բնույթի է, որին մասնակցում են մշակութային միավորումներ, ստեղծագործական խմբեր և անհատներ:
Այն նպատակ ունի աշխուժացնել մայրաքաղաքի, մարզերի երիտասարդական ստեղծագործական մթնոլորտը, բացահայտել նոր անուններ, ընդլայնել ստեղծագործ երիտասարդների մասնագիտական համագործակցության շրջանակը:
«Արտ-ֆեստ» երիտասարդական հանրապետական բաց փառատոնն իր ձևաչափով տարբերվում է թատերական այլ փառատոներից, քանի որ այն ընդգրկում է արվեստի մի քանի ոլորտ միաժամանակ` թատերարվեստ, կինոարվեստ, կերպարվեստ: Փառատոնն անցկացվում է ՀՀ մշակույթի նախարարության և Երևանի քաղաքապետարանի աջակցությամբ:
analitik.am-ը փառատոնի ինֆորմացիոն հովանավորներից մեկն է:
