ՀՀ առողջապահության նախարար Դերենիկ Դումանյանի մոտ այսօր կայացած բժշկական օգնության որակի և կոռուպցիոն ռիսկերի վերահսկման նպատակով ստեղծված հանձնաժողովի հերթական նիստում քննարկվել են դեղերի ոլորտին առնչվող հարցեր։ Այս մասին տեղեկացնում են ԱՆ լրատվական ծառայությունից:
ՀՀ ԱՆ դեղերի բժշկական տեխնոլոգիաների փորձագիտական կենտրոնի փոխտնօրեն Լիլիթ Ղազարյանը, ներկայացնելով «Դեղերի մասին» ՀՀ օրենքի նախագիծը, նշել է, որ առկա օրենք այսօր հնարավորություն չի ընձեռում ապահովելու դեղի շրջանառության պատշաճ գործունեության միջազգային այժմյան չափորոշիչների ապահովումը։ Նաև բացակայում են ենթաօրենսդրական շատ փաստաթղթերի հիմքերը։
«Այս դաշտում առկա հիմնախնդիրներին հիմնավոր լուծումներ տալու ճիշտ ճանապարհը ոլորտի մայր օրենքի հիմնարար փոփոխությունն էր։ Նոր օրենքի նախագիծը երկար ժամանակ լուրջ քննարկումների առակա է դարձել։ Այն քննարկել ենք Հայաստանի դեղագործության ոլորտի կազմակերպությունների, տեղական արտադրողների, արտասահմանյան դեղագործական ընկերությունների հայաստանյան ներկայացուցչությունների, ներմուծող ընկերությունների, փորձագետների ու իրավաբանների հետ։ Արդյունքում լավ մշակված փաստաթուղթ ունեցանք։ Ոլորտում առկա գրեթե բոլոր խնդիրները կանոնակարգվում են։ Կարևորն այն է, որ նոր օրենքը հնարավորություն կտա ապահովելու դեղի` արտադրողից մինչև սպառողին հասնելու անվտանգ շղթա»,-ասել է նախարար Դերենիկ Դումայանը:
Հանձնաժողովի անդամները նկատել են, որ մանրակրկիտ աշխատանքի արդյունքում ստեղծվել է մի նախագիծ, որն իրավական դաշտ կստեղծի ազգաբնակչությանն ինչպես որակյալ և անվտանգ դեղերով ապահովելու, այնպես էլ սոցիալական խնդիր լուծելու համար։
ՀՀ դեղարտադրողների և ներմուծողների ասոցիացիայի (ԴԱՆ միություն) տնօրեն Սամվել Զաքարյանը ներկայացրել է Հայաստանի դեղագործության ոլորտի մարկետինգային գործունեության կանոնագրքի նախագիծը։ Նախատեսված է նաև վեճերի կարգավորման հանձնաժողովի ստեղծում։
Հանձնաժողովում ընդգրկված միջազգային և տեղական հասարակական կազմակերպությունների ներկայացուցիչները հավանության են արժանացրել ներկայացված փաստաթուղթը։
