Երիտասարդ Բժիշկների Հայկական Ասոցիացիայի անձնակազմը “Օգնության Ձեռք” նախաձեռնության շրջանակներում մարտի 22-23 կրկին Վանաձորում էր:
Այս մասին Analitik.am-ի հետ զրույցում ասաց «Օգնության Ձեռք» նախաձեռնության ծրագրերի համակարգող Սուսաննա Գյուրջյանը: Մեր այն հարցին, թե ինչո՞վ էր պայմանավորված իրենց երկրորդ այցը Վանաձորը, մեր զրուցակիցը պատասխանեց.
«Մենք սկսել ենք իրագործել «Օգնության Ձեռք» նախաձեռնության երկրորդ փուլը:
Այս անգամ անձնակազմը «Հույսի տուն» ինտերնատում իրականացրեց ծրագրի երկրորդ փուլը՝ արդեն իսկ ախտորոշված հիվանդներին ապահովելով համապատասխան դեղորայքով:Այդ հարցում մեզ աջակցել են մի քանի դեղագործական ընկերություններ: Նաև բուժզննում և ախտորոշում իրականացնելու համար այս անգամ այցելեցինք Վանաձորի «Օրրան» բարեգործական հիմնադրամ և «Ծերերի տուն» ինտերնատ »
Հիշեցնենք, որ նախաձեռնությունը իր նախորդ այցի ընթացքում ինտերնատում իրականացրել էր ծրագրի առաջին փուլը՝ ծերերի բուժզննման և բուժօգնության կազմակերպում:
Սուսաննա Գյուրջյանը նշեց, որ այս այցի ընթացքում հետազոտվեցին «Օրրան» բարեգործական հիմնադրամի երեխաները, և նաև, «Ծերերի տուն» ինտերնատի 52 բնակիչները:
Մեզ հետ զրույցում Սուսաննա Գյուրջյանը նաև նշեց, որ «Օգնության Ձեռք» նախաձեռնության շրջանակներում «Երիտասարդ բժիշկների հայկական ասոցիացիայի» բժիշկների՝ մարզեր այցելությունները շարունակական են լինելու: Նա նաև հավելեց, որ շատ հիվանդներ վիրահատական միջամտության և շատ ավելի լուրջ բուժման կարիք ունեն, որի իրականացումը հնարավոր կլինի ապահովել հովանավորների շնորհիվ, ովքեր, ցանկության դեպքում կարող են իրենց փոխանցումներն անել «Օգնության Ձեռք» հիմնադրամի բանկային հաշվեհամարին:
«Օգնության ձեռք» նախագծի անձնակազմը բաց է համագործակցության համար, և ցանկացողնրը կարող են միանալ նախագծին:
Յունիբանկ 24100278120100 AMD
E-mail հասցե: ognutyandzerq@gmail.com
Հեռ. +374 99 415 00, +374 99 218 740
Սոնա Հարությունյան