ՀՀ առողջապահության նախարար Արմեն Մուրադյանը վարչապետ Հովիկ Աբրահամյանի հետ մայիսի 16-ին այցելեց Արագածոտնի մարզի Կոշ համայնքի «Արմենակ և Աննա Թադևոսյաններ» բժշկական կենտրոն, որին կից իրականացվում է մշտական բժշկական հսկողություն՝ վերականգնողական ծառայություններ տրամադրելով հաշմանդամություն ունեցող երեխաներին: Ծանոթացել են ստեղծված պայմաններին, նորագույն սարքավորումներին:
«Մենք քննարկելու ենք մեր նոր մոտեցումը այս կենտրոնի վերաբերյալ: Այն, թե ինչ հնարավորություններ կընձեռենք, որպեսզի այս կենտրոնի արդեն հաջողված աշխատանքներն էլ ավելի խորանան»,-լրագրողների հետ զրույցում ասաց Մուրադյանը:
Նրա գնահատմամբ` կենտրոնի գործունեություննն ուղղված է ոչ միայն հաշմանդամ երեխաներին, ովքեր տարբեր պատճառներով ֆիզիկական և մտավոր խնդիրներ ունեն, այլև իրենց ծնողների վրա ընկած հոգսերի թեթևացմանը:
«Արդյո՞ք կարող ենք օպտիմալացնել շրջակա գյուղերի և այս կենտրոնի ամբուլատոր ծառայությունը: Իհարկե, գյուղերից ամբուլատոր ծառայությունները հանելը և այս կենտրոն բերելը որոշակի լարվածություններ է առաջացնում կապված ֆինանսական և տրանսպորտային խնդիրների հետ»,- ասաց նախարարը:
«Արմենակ և Աննա Թադևոսյաններ» բժշկական կենտրոնը հագեցած է երեխաների ֆիզիկական ակտիվությանը նպաստող, տարիքային տարբեր խմբերի համար նախատեսված ֆիզիոթերապիայի և անձնական խնամքի համար անհրաժեշտ սարքավորումներով և դիդակտիկ նյութերով: Կենտրոնն ունի նաև ժամանակակից ախտորոշման և ֆիզիոթերապիայի սարքավորւմներ, շտապօգնության մեքենա:
Բժշկական այս հաստատության կառուցման համար ներդրվել է 4 մլն դոլար: Այն հնարավորություն ունի միաժամանակ սպասարկել 50 երեխայի: Ցերեկային խնամքի կենտրոնում գտնվելու ընթացքում երեխաները ստանում են վերականգնողական (ֆիզիոթերապիա, ակվաթերապիա), լոգոպետի, հոգեբանի ծառայություններ, 2-անգամյա սնունդ: Երեխաները հնարավորություն ունեն նաև հանգստանալ իրենց համար հարմարեցված ննջասենյակներում: Կենտրոնում արդեն բուժում է ստանում 25 երեխա:
Լուսանկարները՝ Armenpress-ի