Չնայած օգոստոսի առաջին օրերին արձանագրված 40 և ավելի բարձր ջերմաստիճանին, մայրաքաղաքում գրանցված շտապօգնության կանչերի վիճակագրությունը չի փոխվել: «Շտապբուժօգնություն» ՓԲԸ տնօրեն Թագուհի Ստեփանյանը «Արմենպրես»-ի հետ զրույցում հայտնել է, որ կանչերի թիվը բարձրանում է հատկապես հանգստյան օրերին: «Շտապօգնությունը շարունակում է աշխատել կանչերի բարձր թվով, որ արձանագրվել է այս տարվա հունվարի մեկից: Հուլիսի 31-ին, երբ շատ շոգ էր, ունեցել ենք 611 կանչ, օգոստոսի 1-ին` 674: Օրական Երևանում գրանցվում է միջինը 650-670 կանչ»,- ասաց Ստեփանյանը:
Որպես կանոն, կանչերի հիմնական պատճառները սրտանոթային հիվանդություններն են, ճնշման խնդիրներ, շաքարային դիաբետի սրացումները և այլն:
ՀՀ ՏԿԱԻՆ հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանն իր հերթին նշեց, որ այս ամառ ռեկորդային ցուցանիշներ չեն գրանցվել: «Օգոստոսի առաջին օրերին օդի ջերմաստիճանը կազմել է 40.3 °C: Ամենաբարձր ջերմաստիճանը, որ մինչ այժմ գրացվել է Երևանում, եղել է 42 °C` 2010 թվականի օգոստոսի 3-ին, և 43.7 °C` 2011 թվականի հուլսի 31-ին` Մեղրիում»,- ասաց Սուրենյանը:
