Մարդն ինչքան շատ կոֆեինով հարուստ մթերք օգտագործի, այնքան նրա մոտ կնվազի մաշկի քաղցկեղի ամենատարածված ձևերից մեկի` բազալա-բջջային կարցինոմայի զարգացման ռիսկը:
Այդ մասին են վկայում Ամերիկյան ուռուցքաբանական հետազոտությունների ասոցիացիայի անցկացրած հետազոտությունների արդյունքները:
«Չարժե ավելացնել սուրճի օգտագործումը, հիմնվելով միայն այդ տվյալների վրա: Սակայն մեր հետազոտությունները բազալա-բջջային կարցինոման դասում է այն հիվանդությունների շարքին, որոնց զարգացումը նվազում է սուրճի օգտագործման ավելացման հետ:
Այդ թվարկումը ներառում է առողջության համար այնպիսի լուրջ բացասական հետևանքներ, ինչպիսիք են երկրորդ տեսակի շաքարային դիաբետը և Պարկինսոնի հիվանդությունը»,-նշում են ասոցիացիայի գիտնականները:
Բազալիոման մաշկի քաղցկեղի ձևերից մեկն է, որն ԱՄՆ-ում առավել հաճախ է ախտորոշվում: Չնայած այս ուռուցքի դանդաղ աճին, այն լուրջ հիվանդություն է և հանրային առողջապահական համակարգի վրա նշանակալի ծանրաբեռնվածություն է հրահրում:
«Հաշվի առնելով այս հիվանդության նոր դեպքերի մեծ թիվը, սննդակարգի ամենօրյա փոփոխությունները կարող են ոչ միայն տեղային արդյունք ունենալ, այլև լիովին ազդել բնակչության առողջության վրա»,-նշում են գիտնականները:
Նրանք հետազոտություններ են անցկացրել 113 հազար մասնակիցների հետ, մոտ 22,8 հազարի մոտ 20 տարվա ընթացքում նկատվել են բազալա-բջջային կարցինոմայի զարգացում: Հակառակ պատկեր է նկատվել նրանց մոտ, ովքեր շատ սուրճ և կոֆեին պարունակող այլ մթերք են օգտագործել (թեյ, կոկա-կոլա, շոկոլադ): Միևնույն ժամանակ, առանց կոֆեինի պարունակության սուրճը ոչ մի արդյունք չի թողել մաշկի քաղցկեղի զարգացման վրա:
Գիտնականները հիշեցնում են, որ նախկինում փորձամկների վրա անցկացրած հետազոտություններն ապացուցել են կոֆեինի ունակությունն ուռուցքի աճը պաշարելու առումով: Սակայն հարկ է լրացուցիչ հետազոտություններ անցկացնել մարդկանց շրջանում, որպեսզի միանշանակ հաստատվի սուրճի նման արդյունքի մասին: