Շատերին ծանոթ երևույթ է, որ երեխաները դժվար են անցնում աշնանային և ձմեռային տաք հագուստի: Ի դեպ, այս հարցում ոչ պակաս կամակոր ենք նաև մենք՝ մեծահասակներս, բայց եթե մենք գոնե ինքներս ենք հասկանում տաք չհագնվելու հետևանքները, ապա փոքրիկների հարցն ավելի դժվար է: Հասկանալու համար, թե ինչպե՞ս համոզել երեխաներին ավելի տաք հագնվել՝ զրուցեցինք մի քանի երեխայի, ծնողների և հոգեբանի հետ, որոնցից յուրաքանչյուրն իր հետաքրքիր մոտեցումը ներկայացրեց:
Ծնողների շրջանում հաճախ հանդիպող կարծիքներից մեկը երեխային մայրիկի կամ հայրիկի նման հագցնելն է: Երբ երեխան տեսնում է, որ կրելու է նույն գույն ու ձև հագուստ, ինչպիսինը կրում է հայրիկը կամ մայրիկը՝ ավելի սիրով է համաձայնվում: Այս մոտեցմամբ առաջնորդվելով՝ կարելի է նաև ընտրել հագուստ երեխայի սիրելի մուլտի կամ ֆիլմի հերոսների ոճով ու աքսեսուարներով:
Երեխաների պատասխանների մեջ գերիշխում էր այն միտքը,որ ուզում են ինքնուրույն ընտրել հագուստ: Այս մտքի հետ հոգեբանը ևս համամիտ էր, քանի որ դա կարևոր հանգամանքներից է անգամ շատ փոքր հասակում:
Պետք է թույլ տրվի երեխային ինքնուրույն ընտրել ի՞նչ վերարկու, ի՞նչ տաբատ կամ ի՞նչ գլխարկ կրել, եթե անգամ դրանք իրար այնքան էլ համապատասխան չեն. կարևորը եղանակին լինեն համապատասխան:
Ավելացնենք նաև, որ ցանկացած գործողություն ավելի է հեշտանում, երբ ընթացքը զվարճալի է: Պետք է հագնվելու գործընթացը վերածել խաղի, որպեսզի երեխան չկենտրոնանա հագուստի վրա: Հուսանք՝ առաջարկված տարբերակներից գոնե մեկը կգործի ձեր երեխայի դեպքում:
Արմինե Բրսոյան
