Առավոտյան Կահիրեում՝ նախագահական համալիրներից մեկի մոտ, ինքնաշեն պայթուցիկ է գործել: Այս մասին հայտնում է TASS-ը՝ հղում անելով եգիպտական հեռուստատեսությանը:
Հաղորդվում է, որ ռումբը տեղադրված է եղել պալատից ոչ հեռու՝ մայրաքաղաքի Հադաիք էլ-Քուբբա թաղամասում:
Պայթյունի հետևանքով երիտասարդ կին է տուժել:
Մասնագետները ներկայումս ստուգում են արվարձաններում այլ պայթուցիկների առկայությունը:
Դեպքից հետո երկրի ղեկավարի նստավայրում ուժեղացվել է հսկողությունը:
Անցած գիշերվանից դա արդեն երրորդ արտակարգ պատահարն է Եգիպտոսում: Երկրի առողջապահության նախարարության պաշտոնական տվյալներով՝ Մինուֆիյա նահանգում 3 մարդ գնացքում պայթյունի զոհ է դարձել, 10 մարդ վիրավորվել:
Քիչ ավելի ուշ ինքնաշեն ռումբ է պայթել մայրաքաղաքի մետրոյի Էլ-Մարջ կայարանի գնացքում, 3 մարդ վիրավորվել է: Դեպքի վայր ժամանակ սակրավորները ևս մեկ ռումբ են հայտնաբերել ու վնասազերծել:
