Թուրքիայում «Ազգայնական շարժում» կուսակցության` Անթալիայից պատգամավոր Մեհմեդ Գյունալը հայտնել է, որ ՄԱԿ-ը ծրագրեր է սկսել Թուրքիայում Հայաստանի հետ սահմանն ականազերծելու ուղղությամբ:
Ըստ Haberler-ի՝ նա խորհրդարանում հայտնել է, թե «հայերի տեղահանման 100-ամյա տարելիցին ընդառաջ՝ իշխանությունն ու պարոն նախագահը աշխատանքներ են տանում իրենց խոստումներն իրականացնելու ուղղությամբ»: Գյունալը դժգոհություն է հայտնել, թե ՄԱԿ-ի զարգացման ծրագրի՝ ականազերծման ուղղությամբաշխատանքների մասին մամուլում տեղ գտած տեղեկություններում չի նշվում թուրքական ընկերությունների մասին: Նշելով, որ ականազերծման համար մոտ 20 միլիոն եվրո գումար է հարկավոր, նա ասել է. «Ինչո՞ւ է Թուրքիայի Հանրապետությունում ականազերծում իրականացնելու համար ԱՄՆ-ը և ՄԱԿ-ը աշխատանքներ իրականացնում: Թուրքիան չունի՞ այդ գումարը ականազերծման համար:
Ինչո՞ւ է արտասահմանյան կառույցը ականազերծում Թուրքիայի սահմանը: Քանի որ 2015-ն է մոտենում` հայերի տեղահանման 100-ամյա տարելիցը»:
