Մշակույթ 

Ես ցանկանում եմ լինել միակ երգիչը, ով 100 տարեկանում ելույթ կունենա բեմում. Շառլ Ազնավուր

analitik.am

Հայկական ծագմամբ աշխարհահռչակ ֆրանսիական շանսոնյե Շառլ Ազնավուրն այս շաբաթ ելույթ է ունենալու Լոս Անջելեսի Հունական թատրոնի բեմում: Սա նրա հյուսիսամերիկյան համերգներից առաջինն է լինելու: Այդ կապակցությամբ «The Hollywood Reporter» պարբերականը զրուցել է ֆրանսիական էստրադայի արքայի հետ:


Հարցին, թե ինչն է նրան խրախուսում այդքան ջանասիրաբար աշխատել այս տարիքում, երբ մարդկանց մեծամասնությունը թոշակի է անցել, Ազնավուրը պատասխանել է. «Եթե մենք մշտապես չենք աշխատում եւ չենք իրականացնում ծնված գաղափարները, մենք մտավոր առումով ծերանում ենք, իսկ այդ ամենասարսափելի ծերությունն է: Ծնկների հետ խնդիրներ են լինում, բայց քանի դեռ ուղեղն աշխատում է, ամեն ինչ է աշխատում: Ես դեռ բազմաթիվ ծրագրեր ունեմ 10 տարվա համար: Ես ցանկանում եմ լինել միակ երգիչը, ով 100 տարեկանում ելույթ կունենա բեմում: Այդ հրաշալի կլինի. աշխարհում միակը: Պարզապես հարկավոր է 10 տարի սպասել: Ցավոք, դա շատ կարճ է»:


Անդրադառնալով տարատեսակ շոուներին եւ մրցույթներին, ինչպիսիք են, օրինակ, «Ձայն»-ը կամ «Արդյո՞ք գիտես երգի բառերը», աշխարհահռչակ երգիչն ասել է. «Նրանք գալիս են եւ կարծում են, թե աստղեր են, բայց երբեք այդպիսիք չեն դառնա: Հնարավոր է՝ տասը հազարից մեկը դառնա: Հնարավոր է: Իսկ այդ շոուները դա մատուցում են որպես երազանք, բայց նման երազանքը կարող է մղձավանջ դառնալ: Մենք պետք է երիտասարդներին օգնենք հասկանալ, որ այդպես չի լինում, որ ծանր աշխատանք է հարկավոր»:

Նույն շարքից