ՀՀ կառավարությունը «Ռադիոիզոտոպների արտադրության կենտրոն» ՓԲԸ-ին 792,4 մլն դրամ (1.9 մլն դոլար) բյուջետային վարկ կտրամադրի: Միջոցները կհատկացվեն 15 տարով եւ նախատեսված են շենքի վերազինման նպատակով:
Բժշկական իզոտոպների արտադրության կենտրոնի շինարարություն անցկացվում է բելգիական KBC բանկի աջակցությամբ եւ համակարգվում է Հայաստանի մրցունակության ազգային հիմնադրամի կողմից: Այն կառավարող ընկերությունը ամերիկյան «Global Medical Solutions»-ն է, որը ղեկավարում է Հայկ Բաքերջյանը:
Միջուկային բժշկության գերազանցության կենտրոն հիմնելու մասին որոշումը կայացվել էր 2008թ. փետրվարին: Կենտրոնը գտնվելու է Երեւանի ֆիզիկայի ինստիտուտի բազայում, դրա ստեղծման արժեքը կազմելու է 30 միլիոն եվրո: Բելգիական «IBA Molecular»-ի պրոտոնային արագացուցիչը 5 միլիոն կարժենա: Այդ գումարի վարկը տրամադրելու է KBC-ն՝ 11 տարով, առանց տոկոսադրույքի:
Վարչապետ Տիգրան Սարգսյանը նշել է, որ ծրագրի վաղաժամ իրականացման շնորհիվ վարկի գումարը հաջողվել է 3,5 մլն դոլարից կրճատել 1,9 միլիոնի: