Հոկտեմբերի 17-25-ը Հայաստանի Հանրապետության և Հայաստանի Կարս նահանգի տարածքում (ներկայիս Թուրքիա) անցկացվում է երրորդ հայ-ռուսական գիտազբոսաշրջային գիտարշավը: Այն կազմակերպել է Հայաստանի հանրապետական կուսակցության երիտասարդական կազմակերպությունը` Ռուսաստանի տուրիզմի միջազգային ակադեմիայի և վերջինիս մասնաճյուղի՝ Տուրիզմի հայկական ինստիտուտի հետ համատեղ: Ծրագիրը կրում է «Ռուսական հետք» խորագիրը և նվիրված է Հայրենական մեծ պատերազմի հաղթանակի 70-ամյակին:
Արշավախմբի հիմնական նպատակն է բացահայտել «ռուսական հետքը» երրորդ հայ-ռուսական գիտազբոսաշրջային գիտարշավի հիման վրա: Դրանք ռազմական, քաղաքացիական, կրոնական, տրանսպորտային միջոցներ են՝ կառուցված և մինչև մեր օրերը պահպանված:
Գիտարշավի ընթացքում երիտասարդները տեսան այն հուշարձանները, կոթողները, որոնք խորհրդանշում են հայ և ռուս ժողովուրդների դարավոր բարեկամությունը: Նրանք ծանոթացան նաև մոլոկանների, գերմանացիների, կազակների բնակության վայրերին և այդ տարածքներում պահպանված մշակութային օբյեկտներին: Տեղի ունեցավ նաև աշխարհագրական նկարահանում:
Գիտարշավի արդյունքների հիման վրա կմշակվի նոր զբոսաշրջային ապրանքների նախագիծ, որոնք վաճառքի կհանվեն ռուսական շուկայում:
Ծրագրի ավարտից հետո կկազմակերպվի լուսանկարների ցուցահանդես Երևանում և Մոսկվայում:
ՀՀԿ երիտասարդական կազմակերպություն
