Ձեռքը ձեռք է լվանում, 2 ձեռքը՝ երես…. ահա այս կարգախոսով է առաջնորդվում «Օգնության ձեռք» բժիշկների թիմը՝ անվճար բուժզննում ու բուժօգնություն իրականացնելով մարզերի ու մայրաքաղաքի ծերանոցներում բնակվող տարեց մարդկանց և մանկատան երեխաներին, ինչպես նաև անապահով ընտանիքներին:
«Օգնության ձեռք» նախաձեռնությունն այս անգամ Գյումրիում էր: Նախաձեռնության այս այցը ամփոփելու համար զրուցեցինք «Երիտասարդ բժիշկների հայկական ասոցիացիայի» ծրագրերի համակարգող Սուսաննա Գյուրջյանի հետ:
-Եվս մեկ անգամ խոսենք նախաձեռնության նպատակի մասին: Ո՞րն է «Օգնության ձեռք» նախաձեռնության նպատակը:
-«Օգնության ձեռք» նախաձեռնության նպատակն է ձեռք մեկնել ՀՀ բոլոր մարզերում և մայրաքաղաքում գտնվող ծերանոցներում բնակվող տարեց մարդկանց և մանկատան երեխաներին, ինչպես նաև անապահով ընտանիքներին: Իրականացնել բուժզննում, այնուհետև ըստ հետազոտության տվյալների, ովքեր կունենան լուրջ հետազոտման և բուժման կարիք, ցուցակագրել և գտնել հովանավորներ, որոնք կհոգան տվյալ հիվանդների հետագա բուժման և վիրահատության ծախսերը:
-Այս անգամ այցը դեպի Գյումրի էր և առավել ընդգրկուն: Խոսենք այդ մասին:
-«Պալեատիվ օգնության հայկական ասոցիացիայի», MPMS ընկերության և «Երիտասարդ բժիշկների հայկական ասոցիացիայի» համատեղ կազմակերպած «Օգնության ձեռք» նախագծի թիմը, «ԵԲՀԱ»-ի նախագահ` Գևորգ Գրիգորյանի գլխավորությամբ փետրվարի 8-ից 9-ը այցելեց Գյումրի:
Առաջին օրը երիտասարդ բժիշկներից բաղկացած անձնակազմը բաժանվեց երկու խմբի: Մի խումբը բուժզննում իրականացրեց «Բեռլին» պոլիկլինիկայում, որտեղ հետազոտվեցին մոտ 100 մանկատան երեխաներ, իսկ մյուս խումբը բուժզննումն իրականացրեց ծերանոցում, որտեղ հետազոտվեցին 80-ից ավել ծերեր:
Երկրորդ օրը բուժզննում իրականացվեց մոտ 50 շահառուների և անապահով, անապաստան երեխաների:
Երկու օրվա ընթացքում հետազոտվեցին 230-ից ավել մարդ:
Մեզ աջակցող դեղագործական կազմակերպությունների կողմից տրամադրված դեղորայքը նշանակվեց և անվճար տրվեց հիվանդներին:
-Նախաձեռնող թիմը միշտ նույն կազմո՞վ է մեկնում մարզեր և ովքե՞ր կարող են միանալ նախաձեռնությանը:
-Ի ուրախություն մեզ «Օգնության ձեռք» նախաձեռնության թիմը էլ ավելի է մեծանում: Գյումրի մեկնելուց մեր թիմին միացան մի շարք մասնագետներ ոչ միայն Երևանից, այլ նաև Գյումրիից:
Մեր նախաձեռնությանը կարող են միանալ բոլոր այն բժիշկները, ովքեր կիսում են մեր գաղափարը:
-Կա՞ն մասնագետներ, ովքեր թիմում ընդգրկված չեն, բայց ում կարիքը նախաձեռնությունն ունի:
-Մեր թիմում ընդգրկված են անհրաժեշտ բոլոր մասնագետները:
- Թիմի տպավորություններն այս այցից:
-Մեր աշխատանքային թիմին ընդունեցին շատ ջերմ: Թե մանկատան երեխաները, և թե տարեց մարդիկ հուզված էին և շոյված մեր վերաբերմունքից: Վերադարձել ենք դրական էմոցիաներով:
-Կա՞ բան, որն այս պահին կցանկանայիք ասել:
-Ուզում եմ շնորհակալություն հայտնել բոլորին…«Օգնության ձեռք» նախաձեռնության թիմի անունից շնորհակալություն եմ հայտնում Zambon Pharma, Walmark-Armenia, Bon Pharm դեղագործական ընկերություններին՝ դեղորայքով ապահովելու համար:
Շնորհակալ ենք Platinum ink ընկերությանը, DIAGEN լաբորատորիային, Հիմալայա դեղագործական ընկերությանը, ԿՀՄԻ ԲԱԿ-Երևան ախտորոշիչ կենտրոնին՝ աջակցելու համար, ինչպես նաև Գյումրիում մեր թիմին միացած բուժանձնակազմին և «Բեռլին» պոլիկլինիկայի տնօրինությանը:
Analitik.am-ը ևս մեկ անգամ շնորհակալություն է հայտնում «Օգնության ձեռք» նախաձեռնության ամբողջ թիմին՝ անձնվեր գործի համար և մաղթում միայն հաջողություն: