ՀՀ առողջապահության նախարար Արմեն Մուրադյանն այցելեց «Արմենիա» հանրապետական բժշկական կենտրոն: Բժշկական հաստատության գլխավոր տնօրեն Գրիգոր Գրիգորյանի ուղեկցությամբ նա շրջեց բաժանմունքներով, հետաքրքրվեց հիվանդների առողջական վիճակով, զրուցեց նրանց հետ: Ուշադրություն դարձրեց հատկապես վերակենդանացման բաժանմունքի հագեցվածությանն ու ծառայությունների կազմակերպմանը։
Նախարարը դրական գնահատեց բազմապրոֆիլ կենտրոնի` ժամանակակից չափանիշներին համապատասխանեցնելուն ուղղված լայնածավալ աշխատանքները:
«Արմենիան» մայրաքաղաքի դինամիկ զարգացող բժշկական կենտրոններից մեկն է»,-ընդգծեց նախարարը` իր գոհունակությունը հայտնելով ղեկավարության կողմից որդեգրած զարգացման ծրագրերի առթիվ:
Գրիգոր Գրիգորյանի խոսքով` կենտրոնի գլխավոր նպատակն է բարձրացնել բժշկական ծառայությունների որակը` հիմնվելով բարձր հմտությամբ օժտված բուժանձնակազմի և տասնյակ տարիների ընթացքում ստեղծած հեղինակության վրա և դառնալ լավագույններից մեկը հանրապետությունում:
Այժմ լայն թափով շինարարական աշխատանքներ են ընթանում վիրաբուժության, փսիխոստոմատիկ, ինվազիվ սրտաբանության ծառայության բաժանմունքներում:
Վերջին տարիներին վերանորոգվել և լիովին վերազինվել են հեմոդիալիզի, անոթային վիրաբուժության բաժանմունքները:
Հանրապետական բժշկական կենտրոնը հիվանդներ է ընդունում ինչպես Հայաստանից, այնպես էլ արտասահմանից: Նրանք հնարավորություն ունեն ստանալու ստացիոնար, և ամբուլատոր բուժում` դիալիզի, հիպերբարիկ օքսիգենացման, վերականգնման և հոգեթերապիայի բաժանմունքներում, ինչպես նաև հետազոտվել «Արմենիա» ախտորոշման կենտրոնում:
Հիվանդանոցում գործում են 24-ժամյա պահպանության ծառայություն, ճաշարան, գրքերի կրպակ, բանկ, դեղատուն, պարենային խանութ, մարզասրահ և 24-ժամյա ավտոկայանատեղի, ինչպես նաև հիվանդների տեղափոխման ծառայություն քաղաքից, օդանավակայանից, Հայաստանի տարբեր մարզերից, Արցախից և Վրաստանից:
Կենտրոնը Հայաստանի ամենամեծ բժշկական հիմնարկներից է։ Այն հիմնադրվել է 1920-ականներին, 1970 թ. սկսել է գործել Մարգարյան 6 հասցեում գտնվող նորակառույց համալիրում։ Բազմապրոֆիլ հիվանդանոցում գործում է 23 բաժանմունք, որտեղ միաժամանակ կարող է ստացիոնար բուժում ստանալ ավելի քան 800 հիվանդ:
