ԼՂՀ առողջապահության նախարար Հարություն Քուշկյանը այցելել է հանրապետության առողջապահական մի շարք հիմնարկներ։
«Արցախպրես»-ի հաղորդմամբ, ինչպես տեղեկացնում է ԼՂՀ առողջապահության նախարարության կայքէջը, օրերս նախարարը եղել է Հանրապետական բժշկական կենտրոնում, որտեղ ծանոթացել է անգիոգրաֆիկ բաժանմունքի շինարարական աշխատանքների ընթացքին։
Տեղում շինարարների հետ նա քննարկել է նորաստեղծ բաժանմունքի պայմանների՝ միջազգային չափորոշիչներին համապատասխանության հարցերը, հստակեցրել շինաշխատանքների վերջնաժամկետները, ինչպես նաև համապատասխան հանձնարարականներ տվել։
Հանրապետական բժշկական կենտրոնում Հ. Քուշկյանը հանդիպել է բուժանձնակազմին, նրանց հետ քննարկել օրախնդիր հարցեր։ Նախարարը առանձնահատուկ ուշադրություն է դարձրել կենտրոնում բուժքույրական գործի կազմակերպմանը։ Փորձի փոխանակման նպատակով պարբերաբար Երևանի «Էրեբունի» և «Նաիրի» բժշկական կենտրոններից Ստեփանակերտ են այցելում նաև բուժքույրեր, ովքեր իրենց հարուստ փորձն ու գիտելիքներն են փոխանցում տեղի կրտսեր բուժանձնակազմին, նրանց հետ միասին շտկում առկա թերությունները։
Հ. Քուշկյանը հանձնարարել է բուժհիմնարկում խստորեն պահպանել էպիդռեժիմը, հիվանդների համար ապահովել լիարժեք խնամք։
ԼՂՀ առողջապահության նախարարը եղել է նաև Շտապ օգնության կայանում, հետևել շինարարական աշխատանքների ընթացքին։ Ի դեպ, Ստեփանակերտի Շտապ օգնության կայանը ներկայումս հիմնանորոգվում և վերազինվում է ժամանակակից բուժսարքավորումներով, արդիականացվում է կարգավարական կենտրոնը։