ՀՀ արդարադատության նախարար Հովհաննես Մանուկյանը, մեկնաբանելով մամուլում տարածված լուրերը, թե սահմանադրական բարեփոխումների վերաբերյալ իշխանությունները պատրաստվում են զիջումների գնալ, այսօր կառավարության նիստից հետո լրագրողներին ասաց, որ չի լսել նման լուրեր:
«Ես, որպես իրավաբան, բազմիցս ասել եմ, որ Սահմանադրությունը բարեփոխման կարիք ունի, հիմա այսօր, մի փոքր ուշ, մի փոքր շուտ, քննարկման հարց է: Մեր Սահմանադրությունն ունի շատ բացեր ու թերություններ»,-ասաց նա՝ ավելացնելով, որ չի ցանկանում մեկնաբանել քաղաքական գործիչների կարծիքները, տալ քաղաքական գնահատականներ:
Հովհաննես Մանուկյանը նաև չբացառեց, որ որոշ զիջումներ կարող են լինել, և առանցքային խնդիրների շուրջ հնարավոր է համաձայնության գալ. «Գուշակություն անելն անշնորհակալ գործ է, քաղաքականություն է, ամեն ինչ էլ հնարավոր է: Հանրային քննարկումների փուլը ևս դեռևս չի ավարտվել, քաղաքական հարթության մեջ այն ևս չի քննարկվել»:
