Կարո՞ղ եք պատկերացնել մի փաստաբան, ով բառիս բուն իմաստով մեկ օրում նույն քրեական գործով մեղադրյալի պաշտպանից վերածվում է տուժողի ներկայացուցչի:
Ինչքան էլ զարմանալի լինի, բայց կա նման անձնավորություն, ով հաճախ է հայտնվում նման իրավիճակներում՝ վերջինիս անունը Կրոմվել Գրիգորյան է: Փաստաբան, ում մատուցած ծառայությունները բավականին թանկ արժեն, փաստաբան, ով, մեր ունեցած տեղեկությունների համաձայն, դատական գործի մեկ հատորն ուսումնասիրելու համար պահանջում է 500-800$, սակայն երաշխիք չկա, որ ուսումնասիրելուց հետո նա կզբաղվի այդ գործով: Բավականին հետաքրքիր և շատ հաճախ անտրամաբանական մոտեցումներ է աշխատում պարոն Գրիգորյանը: Ստորև ներկայացնում ենք բավականին աղմկահարույց գործերից մեկում՝ Արթուր Զադոյան -Կարո Կարապետյան կռվի արդյունքում հարուցված քրեական գործի մասին է խոսքը, Կրոմվել Գրիգորյանի դերն ու աշխատելաոճը, որն ուղղակի փաստում է, որ Հայաստանի փաստաբանների մասնագիտական էթիկայի ոլորտում ՀՀ Փաստաբանների պալատն անելիքներ շատ ունի:
Եվ այսպես՝
2009թ. հոկտեմբերի 5-ին ՀՀ Ոստիկանության քննչական գլխավոր վարչության Արարատի մարզի քննչական բաժնի Մասիսի քննչական բաժանմունքում` ՀՀ քրեական օրենսգրքի 112-րդ հոդվածի 1-ին մասի և 235-րդ հոդվածի 1-ին մասի հատկանիշներով հարուցվել էր թիվ 44113309 քրեական գործը, որը նույն օրն ըստ քննչական ենթակայության կարգով ուղարկվել է ՀՀ հատուկ քննչական ծառայություն:
Կատարված նախաքննության ընթացքում Արթուր Զադոյանը ներգրավվել էր որպես մեղադրյալ ՀՀ քրեական օրենսգրքի 113 հոդվածի 1-ին մասով։
2010 թվականի ապրիլի 30-ին թիվ 44113309 քրեական գործով վարույթը կասեցվել է ՀՀ քրեական դատավարության օրենսգրքի 31-րդ հոդվածի 1-ին մասի 4- րդ կետով՝ Արթուր Զադոյանի ծանր հիվանդության պատճառաբանությամբ։
2014 թվականի փետրվարի 10-ին քրեական գործով կասեցված վարույթը վերսկսվել է։
Մեղադրական եզրակացությունը կազմվել է քննիչ Վ. Մուրադյանի կողմից դատավարական իրավունքի նորմերի կոպիտ խախտումներով:
Քննիչ Վ.Մուրադյանին խախտումներ կատարելու գործում օգնել և օժանդակել են փաստաբաններ Վահագն Բաբայանը և Կրոմվել Գրիգորյանը, որոնք հանդիսանում են ''Կրոմվել Գրիգորյան՛՛ ՍՊԸ-ի` փաստաբանական գրասենյակի փաստաբաններ: Կրոմվել Գրիգորյանը այդ ՍՊԸ-ի հիմնադիրն է, 50 տոկոս բաժնեմասով, իսկ Վահագն Բաբայանը, ըստ մեր տեղեկությունների, 2013թ-ի հունվարից մինչև սույն թվականի մայիս ամիսը հանդիսացել է նույն գրասենյակի փաստաբան` այսպիսով թույլ տալով ՀՀ փաստաբանի վարքագծի կանոնագրքի 2.3.7 և 3.2.1-3.2.10 կետերով սահմանված պահանջների կոպիտ խախտումներ:
Այսպես`
29.04.2010-ին Կրոմվել Գրիգորյանը նույն քրեական գործով ներգրավվել է որպես Համլետ Ջամալյանի պաշտպան, որը մինչև Կ.Գրիգորյանի ներգրավվելը ցուցմունքներ է տվել Կարո Կարապետյանի և նրա եղբոր Սիմոն Կարապետյանի դեմ, առերեսվել է Սիմոն Կարապետյանի հետ, պնդել է իր ցուցմունքները առերեսումների ժամանակ: Սակայն Կ.Գրիգորյանի ներգրավվումից հետո, վերջինս հրաժարվում է իր ցուցմունքներից, քննիչ Վ.Մուրադյանը քննությամբ պարզում է, որ Կ.Կարապետյանին պատկանող ավտոմեքենաների մաքսային ձևակերպումների փաստաթղթերը կեղծվել են ինչ որ անհայտ անձի կողմից և միտումնավոր կերպով թարմացրել է Կ.Կարապետյանի ավտոմեքենանարի տարեթվերը` դրանով իսկ բարձրացնելով դրանց շուկայական արժեքը՝ հետաքրքիր է, թե ո՞ւմ էր պետք նման լավություն անել Կ. Կարապետյանին:
Եվ այս հիմքով Կրոմվել Գրիգորյան և Վ.Մուրադյան զույգը հասնում է նրան, որ քրեական գործի մի մասը 11.06.2014 թ-ին կարճվում է Կ.Կարապետյանի,Ս.Կարապետյանի և Հ.Ջամալյանի նկատմամբ հանցակազմի բացակայության պատճառաբանությամբ, իսկ Կարո Կարապետյանի գաղտնի բարեկամի` անհայտ անձի կողմից պաշտոնեական փաստաթղթեր կեղծելու մասով` վաղեմության ժամկետն անցնելու հիմքով /հատոր 7 գ/թ 23-27/:
10.05.2010թ. Կրոմվել Գրիգորյանը միջնորդություն է ներկայացրել ՀՀ ՀՔԾ ՀԿԳ ավագ քննիչ Ա.Երեմյանին, որով խնդրել է թույլատրել ծանոթանալ առաջադրված մեղադրանքին և ծանոթանալու նպատակով ստանալ քննչական և այլ դատավարական գործողությունների արձանագրությունների պատճեններ, որոնց մեղադրյալը մասնակցել կամ ներկա է գտնվել: 11.06.2014թ. քննիչ Վ.Մուրադյանի կողմից կայացվել է որոշում տուժող ճանաչելու մասին, որով որոշվել է Կարո Կարապետյանին թիվ 44113309 քրեական գործով ճանաչել տուժող: Տուժող Կ.Կարապետյանը ծանոթանալով որոշմանը հայտարարել է, որ լիազորում է փաստաբան Կրոմվել Գրիգորյանին գործով ներկայացնելու իր շահերը: /հատոր 7 գ/թ 40-42/ : Նույն օրը կայացված որոշմամբ որոշվել է ՀՀ փաստաբանների պալատի փաստաբան Կ. Գրիգորյանին ճանաչել տուժող Կ.Կարապետյանի ներկայացուցիչ և նույն օրը Կ.Գրիգորյանին ծանոթացրել է նշված որոշմանը /հատոր 7 գ/թ 43-46:
Նշված փաստական հանգամանքներն ուսումնասիրելիս չի հասկացվում, թե ինչպես կարող էր քննիչը, ՀՀ քրեական օրենսգրքի 93-րդ հոդվածի 2-րդ կետի խախտմամբ, տուժողի ներկայացուցիչ ներգրավել Կրոմվել Գրիգորյանին այն դեպքում, երբ նա ընդամենը մեկ րոպե առաջ նույն քրեական գործով մեղադրյալի պաշտպանն է եղել: Խախտում է նաև այն, որ քննիչը նշված երեք որոշումները կայացրել է նույն օրը, ուստի նա չէր կարող չնկատել նշանակություն ունեցող այս փաստերը:
Այնուհետև միջնորդություն է ներկայացվում վարույթն իրականացնող մարմնին, որպեսզի հարցաքննեն գործով նոր հայտնաբերված ՛՛վկաներ՛՛ Էդվարդ Հրայրի Թարվերդյանին և Ռոբերտ Մովսեսի Մովսեսյանին, որոնց շահերի պաշտպանությունը ստանձնում է ՛՛Կրոմվել Գրիգորյան՛՛ ՍՊԸ-ի աշխատակից, փաստաբան Վահագն Բաբայանը, վերջինս մասնակցել է ՛՛վկաների՛՛ հարցաքննություններին, առերես հարցաքննություններին:
Նման կոպիտ խախտումների արդյուքնում փաստաբան Կ.Գրիգորյանը փաստացի նախաքննության ընթացքում տիրապետել է ՛՛հիմնական վկաների՛՛ ցուցմունքերին, նրանց մասնակցությամբ տեղի ունեցած առերես հարցաքննություններին, որն էլ հնարավորություն է տվել նրան տեղյակ լինել նաև հակառակ կողմի ցուցմունքներին՝ այսպիսով հնարավորություն ունենալով ուղղորդել նախաքննության ընթացքը, ինչպես նաև լինելով Հ.Ջամալյանի պաշտպանը տիրապետել է այնպիսի տեղեկությունների, որոնք գողացված ավտոմեքենաների մասով էական նշանակություն են ունեցել Կարո Կարապետյանի համար:
