ՀՀ մշակույթի նախարարության աջակցությամբ, «Համագործակցություն» կանանց հասարակական և «Արմենիան մյուզիք սենտր» երաժշտական կազմակերպությունները՝ ս. թ. հոկտեմբերի 8-ին, ժամը 19:00-ին, Հակոբ Պարոնյանի անվան երաժշտական կոմեդիայի պետական թատրոնում կանցկացնի «Երաժշտական երկխոսություն Մետաքսի մեծ ճանապարհին» փառատոնը:
Հայաստանում առաջին անգամ իրականացվող փառատոնին կմասնակցեն երաժիշտներ Մետաքսի մեծ ճանապարհի շուրջ 12 երկրներից՝ Հնդկաստան, Չինաստան, Հայաստան, Ղազախստան, Իրան, Հորդանան, Իսպանիա և այլն:
Յուրաքանչյուր երկրի ներկայացուցիչ կներկայացնի իր ազգային տարազը, ժողովրդական նվագարանն ու ազգային երաժշտությունը, իսկ վերջում բոլոր երկրների ներկայացուցիչները միասին կկատարեն հայկական ժողովրդական ստեղծագործություններ:
Մետաքսի մեծ ճանապարհը կարևոր դերակատարում է ունեցել Փոքր Ասիայի, Կովկասի, Միջին Ասիայի և Չինաստանի ժողովուրդների տնտեսական և մշակույթային կապերի զարգացման գործում: Հնում Հայաստանի՝ Սելիմի լեռնանցքով է անցել Մետաքսի մեծ ճանապարհը, որի մասին հիշեցնում է լեռնանցքի մոտ գտնվող Սելիմի իջևանատունը:
«Երաժշտական երկխոսություն Մետաքսի մեծ ճանապարհին» փառատոնի նպատակն է մասնակիցներին ծանոթացնել Հայաստանի մշակույթին, ավանդույթներին ու կենցաղին, այդ կերպ միջմշակութային սերտ կապեր հաստատելով պատմական այս ուղու վրա գտնվող պետությունների հետ:
Այսօր Առնո Բաբաջանյան համերգասրահում «Երաժշտական երկխոսություն Մետաքսի մեծ ճանապարհին» փառատոնին նվիրված մամուլի ասուլիսին մասնակցում էին ՀՀ մշակույթի նախարարության աշխատակազմի մշակութային ժառանգության և ժողովրդական արհեստների վարչության պետի տեղակալ Երանուհի Մարգարյանը, ծրագրի հեղինակ և գեղարվեստական ղեկավար, ՀՀ ժողովրդական արտիստ, Երևանի Կոմիտասի անվան պետական կոնսերվատորիայի պրոֆեսոր Հասմիկ Լեյլոյանը, ծրագրի կազմակերպիչ, «Համագործակցություն» կանանց ՀԿ-ի տնօրեն Եկատերինա Սիմոնյանը, «Երաժշտական երկխոսություն Մետաքսի մեծ ճանապարհին» համերգի ռեժիսոր Ռուբեն Հովհաննիսյանը, «Արմենիան մյուզիք սենթերի» տնօրեն Լիլիթ Արշակյանը:
Հայաստանում առաջին անգամ կանցկացվի «Երաժշտական երկխոսություն Մետաքսի մեծ ճանապարհին» փառատոնը
