Առողջապահության համաշխարհային կազմակերպության վերջին տվյալների համաձայն՝ Արեւմտյան Աֆրիկայում Էբոլա տենդով հիվանդացած մարդկանց 70 տոկոսը մահացել է: Մահացության մակարդակն ավելի բարձր է եղել, քան ենթադրվում էր ավելի վաղ, տեղեկացնում է BBC-ին:
ԱՀԿ-ն նախազգուշացնում է, որ մինչեւ նոյեմբեր տենդով հիվանդանալու դեպքերի թիվը կարող է եռապատկվել եւ հասնել 20 հազարի, եթե շտապ միջոցներ չձեռնարկվեն համաճարակի դեմ պայքարում:
Ներկայում Գվինեայում, Լիբերիայում եւ Սիեռա Լեոնեում այդ վիրուսից մահացել է արդեն 2800 մարդ: ԱՀԿ-ում նշել են, որ Սենեգալում եւ Նիգերիայում հիվանդության բռնկումները վերահսկվում են:
Wellcome Trust բրիտանական բարեգործական կազմակերպությունը հայտարարել է, որ Արեւմտյան Աֆրիկայում առաջին անգամ կփորձարկվեն Էբոլայի դեմ մշակված փորձարարական դեղամիջոցներ: Դրանց թվում է zMapp պատրաստուկը, որով արդեն բուժել են տենդով հիվանդացած մի քանի բժիշկների:
