Ազգային ժողովի ՀՀԿ խմբակցության պատգամավոր Մարգարիտ Եսայանն այն կարծիքին է, որ մարդու իրավունքները այս կամ այն չափով խախտվում են բոլոր երկրներում, այդ թվում նաև Եվրոպայի խորհրդի անդամ երկրներում: Ազգային ժողովում կազմակերպված խորհրդարանական լսումների ընթացքում պատգամավորն ընդգծեց, որ մարդու իրավունքների պաշտպանության առումով իդեալական երկիր չկա և բոլոր երկրներում էլ մարդու իրավունքները խախտվում են: «Երբ ես լրագրող էի, մի առիթով հնարավորություն ունեցա հանդիպել տարբեր երկրների օմբուդսմենների հետ, և այդ ժամանակ ես նրանց ասում էի, որ իրենց երկրներում մարդու իրավունքների նկատմամբ խախտումներ չեն լինում, իսկ մեր երկրում դրանք շատ են: Եվ այդ ժամանակ նրանք ինձ հորդորեցին նման բաներ չասել, քանի որ մարդու իրավունքները խախտվում են բոլոր երկրներում: Եվ իսկապես այդպես է»,-նշեց Եսայանը:
Նա ընդգծեց, որ այդ ժամանակ Լեհաստանի օմբուդսմենն ասել է, որ Լեհաստանում, երբ ոստիկանը քաղաքացու հեծանիվը տանում է այն սխալ կայանելու համար, դա իրենց համարվում է մարդու իրավունքների խախտում: «Ես շատ կցանկանայի, որպեսզի մեր երկրում էլ մարդու իրավունքների խախտումները լինեին այնպիսիք, ինչպես սխալ կայանած հեծանիվը տանելն է, քան այն խախտումները, որ այսօր կան մեր երկրում»,- ընդգծեց պատգամավորը:
Պատգամավորի դիտարկման հետ համաձայնեց ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի տեղակալ, «Ժառագնություն» խմբակցության պատգամավոր Ալեքսանդր Արզումանյանը: «Ես համաձայն եմ, որ իդեալական երկրներ այս առումով չկան: Որպես վառ օրինակ կարող եմ բերել ԱՄՆ կոնգրեսի կողմից հրապարակված զեկույցը մարդու իրավուքների պաշտպանության վերաբերյալ, որտեղ նշվում է, որ 2001թ. սեպտեմբերի 11-ից հետո բանտերում 119 մարդ կտտանքների է ենթարկվել: Եվ ցավալի է, որ ԱՄՆ-ի նման երկրում նման բան է տեղի ունենում»,- ընդգծեց Արզումանյանը:
Ալեքսանդր Արզումանյանը նաև կարծիք հայտնեց, որ մեծ երկրներում մարդու իրավունքների խախտումներն ավելի շատ են, քան փոքր երկրներում:
Ազգային ժողովի մարդու իրավունքների և հանրային հարցերի մշտական հանձնաժողովը մարդու իրավունքների միջազգային օրվա կապակցությամբ հրավիրել է խորհրդարանական լսումներ՝ ԵԽԽՎ «Քաղաքական բանտարկյալի սահմանումը» թիվ 1900 բանաձևի կատարման վերաբերյալ: Բանաձևով սահմանվում են քաղաքական բանտարկյալ ձևակերպման չափանիշները: