Արևի էներգիայով գործարկվող Solar Impulse 2 ինքնաթիռը երկուշաբթի կսկսի իր առաջին շուրջերկրյա չվերթը Միացյալ Արաբական Էմիրությունների մայրաքաղաքից:
՛՛Այսօր արևի էներգիայով գործարկվող շվեյցարիական ինքնաթիռը Աբու Դաբիից կսկսի շուրջերկրյա թռիչքը, որը կլինի ավիացիայի պատմության մեջ նման առաջին թռիչքը՛՛,- հայտնում է ծրագրի ղեկավար և օդաչու Անդրե Բորշբերգը:
Օդային ճանապարհորդությունը կտևի մոտ հինգ ամիս, և այդ ընթացքում ինքնաթիռը կթռչի 35 հազ. մղոն:
Նախատեսվում է, որ 12 ժամվա ընթացքում այն կժամանի Օման: Ժամանակակից մարդատար ինքնաթիռները հաղթահարում են այդ հեռավորությունը մեկ ժամվա ընթացքում, սակայն ի տարբերություն Solar Impulse 2-ի դրանք օժտված են գերհզոր ռեակտիվ շարժիչներով:
Օմանից ինքնաթիռը կթռչի դեպի Հնդկաստան, այնուհետև Չինաստան, Խաղաղ օվկիանոսը հատելով այն կհասնի ԱՄՆ և Եվրոպա: Օդանավը կհատի նաև Ռուսաստանի օդային սահմանը: Թռիչքի ընթացքում նախատեսվում է կատարել 12 կանգառ: