Առողջապահության նախարար Արմեն Մուրադյանը, այսօր լրագրողների հետ զրույցում
անդրադարձավ Գյումրի քաղաքում տեղի ունեցած միջադեպին, երբ ծեծել էին շտապօգնության բժշկին, և ասաց, թե մինչև իրավապահների գնահատականը նաև հասարակական գնահատական պետք է հնչի՝ բժիշկների հանդեպ նման ցինիզմի և դաժանության հետ կապված։
«Այդ նույն թասիբով ժողովրդին կուզենայի կոչ անել, որ սա արդեն երկրորդ դեպքն է, որ նման ցինիզմով և դաժանությամբ վերաբերմունքի է արժանանում մի մարդ, որը եկել է բուժօգնություն ցուցաբերելու: Մինչև իրավապահների գնահատականը նաև հասարակական գնահատական պետք է հնչի՝ բժիշկների հանդեպ նման ցինիզմի և դաժանության հետ կապված»,– ասաց նա:
«Առհասարակ, ինչ վերաբերում է շտապօգնության աշխատանքից, իր չափորոշիչների մեջ սահմանված ժամկետում մեքենան եղել է տեղում, եթե չեմ սխալվում՝ 5 րոպե հետո»,- ավելացրեց նա:
Նախարարն ասաց, որ այդ բոլոր նյութերը հաշվի են առնելու համապատասխան մարմինները, իրենք ուշիուշով հետևելու են.«Դաժան ծեծի են ենթարկվել և բժիշկը, և բուժքույրը, և վարորդը»: