ԵՄ գերագույն հանձնակատար Ֆեդերիկա Մոգերինին և հարևանության քաղաքականության հարցերով Եվրահանձնաժողովի անդամ Յոհաննես Հանը կիրակի հանդես են եկել համատեղ հայտարարությամբ, որում դատապարտել են ոստիկանական արշավներն ու մի շարք լրագրողների և ԶԼՄ-ների ներկայացուցիչների ձերբակալությունները Թուրքիայում:
Ինչպես հայտնում է INTERFAX.RU-ն` նրանց խոսքով` նման գործողությունները անհամատեղելի են մամուլի ազատության հետ, որը ժողովրդավարության հիմնական սկզբունքն է:
«Մենք ակնկալում ենք, որ կգործի անմեղության կանխավարկածը և հիշեցնում ենք ցանկացած ենթադրյալ իրավախախտման դեպքում մեղադրյալների իրավունքների լիակատար պահպանման և անկախ ու թափանցիկ հետաքննության անհերքելի իրավունքի մասին», - ասվում է Բրյուսելում տարածված հայտարարության մեջ:
Մոգերինին և Հանը հայտարարել են, որ այդ ոստիկանական գործողությունները «ուղղված են ընդդեմ եվրոպական արժեքերի և չափանիշների», որոնց ձգտում է Թուրքիան և որոնք պետք է հիմնարար լինեն ԵՄ-ի հետ ամուր հարաբերություններում»:
