Լրագրողների ձերբակալությունները «հակասում են եվրոպական արժեքներին ու չափորոշիչներին, որոնց մաս է ցանկանում դառնալ Թուրքիան», ասված է ԵՄ արտաքին հարցերով հանձնակատար Ֆեդերիկա Մոգերինիի ու եվրոպական հարևանության քաղաքականության հարցերով եվրահանձնակատար Յոհանես Հանի համատեղ հայտարարության մեջ:
«Մենք հիշեցնում ենք, որ որևէ երկրի որպես թեկնածու ճանաչելու ցանկացած հետագա քայլ պայմանավորված է օրենքի և հիմնարար իրավունքների լիակատար պահպանմամբ»,- ասված է հայտարարության մեջ:
Հայտարարության մեջ նշվում է, որ խոսքի ազատությունն ու դատարանների անկախությունն առողջ ժողովրդավարության հիմնական տարրերն են և դա ապահովվում է Թուրքիայի սահմանադրությամբ:
ԵՄ ներկայացուցիչներն արդար քննության հույս են հայտնել:
Տեղի ունեցած ձերբակալություններին անդրադարձել է նաև ԱՄՆ պետքարտուղարության ներկայացուցիչ Ջեն Փսակին:
«Որպես Թուրքիայի բարեկամ և դաշնակից՝ մենք իշխանություններին կոչ ենք անում երաշխավորել, որ իրենց գործողությունները չեն խախտում ժողովրդավարության հիմքերը»,- հավելել է Փսակին:
Թուրքիայի վարչապետ Ահմեթ Դավութօղլուն, մեկնաբանելով երկրում լրագրողների ու ոստիկանության սպաների վերջին ձերբակալությունները, հայտարարել է, թե որոշ քայլեր են ձեռնարկվել՝ «պետության մեջ պետություն ստեղծելու» դեմ:
«Այն անձանց գործողությունները, որոնք թափանցել են կառավարություն ու գաղտնալսել են նախագահի ու վարչապետի մասնավոր զրույցները, անպատասխան չեն մնալու: Մեր պարտքն է պաշտպանել այն, ինչ մեզ տրվել է ժողովրդի կամքով», - ասել է Դավութօղլուն:
Հիշեցնենք, որ թուրք իրավապահները ձերբակալել էին 23 մարդու, այդ թվում՝ լրագրողների, որոնք կասկածվում են երկրի ղեկավարության դեմ դավադրությանը մասնակից լինելու համար:
