Մարդու իրավունքների եվրոպական դատարանում ՀՀ կառավարության լիազոր ներկայացուցիչ ինստիտուտը նշում է իր գործունեության տասնամյակը, որի կապակցությամբ այսօր կազմակերպվել էր ՄԻԵԴ-ում մարդու իրավունքների եվրոպական չափանիշների և մարդու իրավունքների արդյունավետ պաշտպանության ապահովման թեմայով միջազգային համաժողով:
ՀՀ արդարադատության նախարար Հովհաննես Մանուկյանը նույնպես ներկա էր այդ համաժողովին:
ՀՀ արդարադատության նախարարը իր ելույթում ասաց, որ ժամանակակից աշխարհում մարդու իրավունքների պաշտպանությունը քաղաքակիրթ յուրաքանչյուր երկրի խնդիրն է: «Այսօր, ըստ էության, չկա մեր կյանքի որևէ ոլորտ, որն այս կամ այն ձևով չառնչվի եվրոպական կոնվենցիայի իրավական դիրքորոշումների հետ»,- ասաց նա և նշեց, որ, ընդ որում, դրանք այնքան ճկուն են, որ կարող են կիրառվել հասարակական ոլորտներում:
«Չնայած դրան՝ Մարդու իրավունքների եվրոպական դատարանը բարդ մարտահրավերների առաջ է կանգնած»,- ասաց նախարարը և պարզաբանեց, որ դրանք կապված են դատարանի ծանրաբեռնվածության և գանգատների թվի հետ:
