ՀՀ գլխավոր դատախազ, Մարդու իրավունքների եվրոպական դատարանում ՀՀ կառավարության լիազոր ներկայացուցիչ Գևորգ Կոստանյանն այսօր մամուլի ասուլիսին ասաց, որ Արամ Մանուկյանին ծեծելու համար կասկածվող անձն ազատ է արձակվել, որովհետև, ըստ համապատասխան մարմնի, դա ծանր հանցագործություն չէ:
Ըստ գլխավոր դատախազի՝ որևէ անձի նկատմամբ վիրավորական արտահայտություններն անթույլատրելի են, իսկ խոսքի ազատությունը միշտ պետք է տարբերել վիրավորանքից: Այս մասին Գևորգ Կոստանյանն ասաց՝ պատասխանելով հարցին, թե որևէ պաշտոնյային վիրավորելը կարո՞ղ է հիմք հանդիսանալ մարդուն ծեծելու համար՝ նկատի ունենալով ազատամարտիկների նկատմամբ բռնությունների վերջին դեպքերը:
«Խոսքի ազատությունը չպետք է շփոթել վիրավորանքի կամ զրպարտության հետ, այն չպետք է անցնի վիրավորանքի շեմը»,-ասաց նա և նշեց, որ մասնավոր հայտարարությունների հետ կապված չի ցանկանում մեկնաբանություն տալ։
Նա անթույլատրելի համարեց վիրավորական ոճը՝ ցանկացած մարդու կողմից, դա կլինի սովորական քաղաքացի, թե պաշտոնյա: «Քննությունը կպարզի, թե դա ինչի հետևանք էր: Ծեծը, անկախ շարժառիթից, հանցագործություն է»,-ասաց նա:
Գլխավոր դատախազը չի կարծում, որ վերջին շրջանում այս դեպքերը ամենաթողության արդյունք են, այլ գտնում է, որ դա դիտավորություն է յուրաքանչյուր սուբյեկտի կողմից:
