Միջպետական պայմանագրով և ՀՀ օրենսդրությամբ՝ Գյումրիի սպանության գործի ընդդատությունը պատկանում է ՀՀ-ին: Այսօր լրագրողների հետ զրույցում ասաց ՀՀ-ում Մարդու իրավունքների պաշտպան Կարեն Անդրեասյանը՝ նշելով, որ ակնկալում է, որ գործի քննությունը և հետագա ընթացքը տեղի կունենա ՀՀ-ում, կդատապարտվի ՀՀ-ի օրենսդրությամբ և ՀՀ մարմինների կողմից:
«Հենց նույն միջպետական պայմանագրով մեղադրյալն այժմ գտնվում է ՀՀ-ի տարածքում և արտահանձնման կամ հանձնման մասին խոսք չկա, կա միայն փոխանցելու մասին խոսք և կարծում եմ, որ Գլխավոր դատախազությունը գրավոր կպահանջի այդ փոխանցումը, որպեսզի գործընթացները լինեն այնպես, ինչպես ակնկալում է մեր հասարակությունը»,- ասաց նա:
Հարցին, թե ինչպես է գնահատում ՀՀ գլխավոր դատախազի գործողությունները, պատասխանեց. «Որևէ գործողություն ես չեմ մեկնաբանել, բայց նրա տրամադրած տեղեկատվությունը օգտակար է մեր տեղեկատվության համար: Չեմ էլ կարող իրար համեմատել նրա հայտարարությունները, բայց դատավարությունը պետք է լինի Հայաստանում, այդ պատասխանը ճիշտ է»:
Անդրադառնալով կատարվածի հետ իր աշխատանքային պարտականություններին, ասաց.«Այս պահի դրությամբ, որևէ օրենքի խախտում չենք արձանագրել, այլ բան է, որ բոլորս ունենք մտահոգություններ, և եթե դրանք ճիշտ ձևով չփարատվեն, կարող են դառնալ մարդու իրավունքների խախտում: Այդ ժամանակ կտեսնեք մեր հայտարարությունը և մեր պաշտոնական գնահատականը»։
