ՀՀ գլխավոր դատախազ Գևորգ Կոստանյանը Շիրակի մարզի դատախազության առաջ բողոքի ակցիայի ժամանակ հայտարարեց, որ ինչպես պահանջում են գյումրեցիները ինքը դիմելու է ՌԴ գլխավոր դատախազին:
«Նախորդ անգամ, որ իջա, դուք մի կարևոր պահանջ դրեցիք՝ արդյո՞ք ես դիմելու եմ ՌԴ-ին և իրավապահ մարմիններին, որ հարուցված քրեական գործը և անձը ամբողջությամբ տրամադրվեն մեր իրավազորության տակ: Ես հիմա որպես գլխավոր դատախազ ասում եմ, որ ես 100 տոկոսով դիմելու եմ այս պահանջով ՌԴ գլխավոր դատախազություն»,-հայտարարեց Գևորգ Կոստանյանը, ինչն ընդունվեց ծափահարություններով:
Սակայն հավաքվածները սկսեցին վանկարկել՝ «Հիմա, հիմա…»:
Դատախազը խոստացավ, որ հարցով կզբաղի, երբ զորամասի ներսում գտնվող քննիչները դուրս գան: «Ես տղամարդու պես ձեզ խոստացա ու դիմելու եմ»,-ասաց նա:
Հարցին, թե մերժվելու դեպքում միանալո՞ւ է ցուցարարներին, գլխավոր դատախազը պատասխանեց. «Առաջին քայլը անենք, տեսնենք՝ ոնց է լինելու, հետո նոր քննարկենք մյուս քայլերը: Չեմ կարող ենթադրությունների հիման վրա որևէ բան ասել»: