Նախորդ նյութերում անդրադարձել էինք հանրահայտ «ֆինանսական բուրգի» քրեական գործին, մասնավորապես փորձել էինք հասկանալ, թե ամբաստանյալի աթոռին նստած, իրեն «միջազգային դավադրության» զոհ հռչակած Ա.Անդրեասյանն իրոք հափշտակել է մոտ 1.000.000 ԱՄՆ դոլարի հասնող գույք, և եթե հանցագործություն իրոք տեղի ունեցել է , ապա որտե՞ղ է հափշտակված գույքը:
Նախորդ նյութերում անդրադարձել էինք, որ տուժողից հափշտակված վերոնշյալ գումարից միայն մոտ 470.000 ԱՄՆ դոլարը գտնվում է Կարեն Բաբակեխյանի մոտ: Սակայն ուսումնասիրելով քրեական գործը, պարզ երևում է, որ Կ.Բաբակեխյանը 2013 թվականի ապրիլին Ա.Անդրեասյանի ձեռքից խլել է նաև վերջինիս «Mitsubishi Pajero» և ամբաստանյալի հոր «Rav 4» ավտոմեքենաները, ինչպես նաև Ա.Անդրեասյանի Փափազյան 11 շենքի բակում գտնվող ավտոտնակը, Ա.Անդրեասյանի եղբոր` Վիլեն Անդրեասյանի Կոմիտասի պողոտայում գտնվող բնակարանը և գործով մեկ այլ տուժող Ա. Քամալյանի թվով 30 հատ կարի մեքենաները:
Ճիշտ է` այս «ավարից» ամբաստանյալի եղբոր տունը հետագայում, երբ արդեն քրեական գործ է հարուցվել, հետ են վերադարձվել, իսկ կարի մեքենաներն էլ հետ են վերադարձրել Ա.Քամալյանից 10.000 ԱՄՆ դոլար ստանալուց հետո:
«Քավության նոխազ» և «միջազգային դավադրության զոհ» (իր իսկ բառերով) ամբաստանյալն իր վրա է վերցնում Կարեն Բաբակեխյանի բոլոր մեղքերը, սակայն գործի հանգամանքներին ուշադիր նայելով տեսնում ենք, որ Կ.Բաբակեխյանը հազիվ է մազապուրծ եղել քրեական պատասխանատվությունից:
Այդ մասին է վկայում նախ և առաջ քրեական գործի քննության ընթացում ՀՔԾ-ում շրջանառվող լուրերն այն մասին, որ Երևան քաղաքի նախկին ոստիկանապետ Ներսիկ Նազարյանը, որ այս գործում նույնպես ունի իր մասնակցությունը` որպես վկա, ՀՔԾ-ում նեղսրտել է, որ իր պաշտոնանկությունն ու անհաջողությունները կապված են միմիայն Կարեն Բաբակեխյանի վաշխառուական հակումների և բնածին անհագ ագայության հետ: Ն.Նազարյանը բառացի ասել է. «Դրանց ագահության պատճառով զրկվեցի պաշտոնից և արատավորվեց իմ ու տղայիս անունը»:
Փաստացի ամփոփելով Կ.Բաբակեխյանի մասնակցությունը այս գործում, ըստ քրեական գործի նյութերի ակնհայտ է,որ 1 000 000 ԱՄՆ դոլարի հափշտակությունը իրական է, որ այդ գումարներից մոտ 500 000 ԱՄՆ դոլարը միայն Կ.Բաբակեխյանի մոտ է:
Համադրելով այս ամենը՝ քրեական գործի նախաքննության սկզբում տրված վկաների և տուժողների ցուցմունքները ակնհայտ է դառնում ևս մեկ հանգամանք. Քրեական գործի սկզբում գործի մասնակիցները ցուցմունքներ են տալիս,որ Ա.Անդրեասյանը մոտ 400 000 ԱՄՆ դոլար է վերցրել Կ.Բաբակեխյանից, ամսեկան 4 տոկոս տոկոսադրույքով՝ վճարելով նրան ամսեկան 16 000 ԱՄՆ դոլար՝ այդ մասին պնդել են բազմաթիվ վկաներ և տուժողներ,սակայն հետագայում և ամբաստանյալը և վկաների մեծ մասը հրաժարվել են իրենց նախնական ցուցմունքներից և ակամայից գալիս ես հետևյալ եզրահանգման՝
կամ իրոք Կ.Բաբակեխյանը վաշխառուական տոկոսներով ամբաստանյալին գումարներ է տվել և երբ հասկացել է, որ վերջինս խորտակվում է, ձեռքից խլել է ինչ պատահի,
կամ,եթե գումար չի տվել, ապա տուժողներին իր երևակայական պարտքը ներկայացնելով, փորձել է օրինականացնել վերջինիս կողմից հափշտակված գումարները՝ այսինքն փաստացի ղեկավարել է ամբողջ ֆինանսական բուրգը:
Հ.Գ Այս բուրգի գործով անցնող այլ պաշտոնյաների մասնակցության մասին կանրադառնանք առաջիկայում: