Թուրքիայի խորհրդարանը հրաժարվել է դատարանի առաջ կանգնեցնել երկրի էկոնոմիկայի նախկին նախարար Զաֆեր Չագլայանին և ՆԳՆ նախկին ղեկավար Մուամեր Գյուլերին, որոնք իրենց պաշտոններից ազատվել են կոռուպցիոն սկանդալի արդյունքում: Այս մասին հայտնում է Ria Novosti-ն:
2013թ. դեկտեմբերին Թուրքիայի ոստիկանությունը անցկացրել է հակակոռուպցիոն գործողություն, որի արդյունքում ձերբակալվել են տասնյակ մարդիկ՝ բիզնեսմեններ, բարձրաստիճան պաշտոնյաներ և նրանց հարազատներ՝ պետական տենդերների հետ մեքենայությունների, պաշտոնեական լիազորությունների չարաշահման և կաշառակերության կասկածանքով:
Անցած տարվա սեպտեմբերին Ստամբուլի գլխավոր դատախազությունը վճռեց, որ կոռուպցիայի գործի շրջանակներում 96 մեղադրյալի, այդ թվում՝ Թուրքիայի նախագահի որդու՝ Բիլյալ Էրդողանի քրեական հետապնդման համար հիմքեր չկան: Հոկտեմբերին դադարեցվել է ևս 53 կասկածյալի քրեական հետապնդումը:
Թուրքիայի խորհրդարանը երեքշաբթի երեկոյան նիստի ժամանակ ուսումնասիրել է խորհրդարանական հանձնաժողովի զեկույցը երկրի ՆԳՆ նախկին ղեկավար Մուամեր Գյուլերի, ԵՄ հարցերով Թուրքիայի նախկին նախարար Էգեմեն Բաղըշի, էկոնոմիկայի նախկին նախարար Զաֆեր Չագլայանի և շրջակա միջավայրի և քաղաքաշինության նախկին նախարար Էրդողան Բայրաքթարի մասին:
Գաղտնի քվեարկության արդյունքում պատգամավորները ձայների մեծամասնությամբ աջակցել են հանձնաժողովի եզրակացությանը՝ հանդես գալով Գյուլերին և Չագլայանին Գերագույն դատական խորհրդին փոխանցելու դեմ, որը գումարվում է գործող և նախկին նախարարների հասցեին մեղադրանքները քննարկելու համար:
Երկու այլ նախարարների հարցով քվեարկությունը սպասվում է ավելի ուշ: