Վրաստանի խորհրդարանը գարնանային նստաշրջանի ընթացքում կքննարկի Աշխատանքային միգրացիայի մասին օրենսգրքի նախագիծը, համաձայն որի գործատուները կկարողանան աշխատանքի ընդունել արտասահմանցի քաղաքացիներին միայն այն դեպքում, եթե նրանց չբավարարի Վրաստանի քաղաքացիների որակավորումը, գրում է newsgeorgia.ru-ն։
Օրինագիծը, որը մոտ ժամանակում կներկայացվի Վրաստանի խորհրդարանին, ենթադրում է բոլոր ընկերությունների պարտադիր գրանցում՝ աշխատակիցներ ընդունելու համար։ Աշխատակիցների թեկնածություններն ընկերություններին կներկայացնի Վրաստանի առողջապահության, աշխատանքի և սոցիալական ապահովության նախարարությունը։
«Դրանում չկա ոչ մի սահմանափակում ներդրողների համար։ Եթե տեղացի աշխատողները չեն բավարարում պահանջներին, ապա ընկերությունը պետք է փաստացի և հիմնավորված ձևով պատասխան տա, որից հետո կկարողանա աշխատանքի ընդունել արտասահմանցի քաղաքացիների»,- նշել է նախարարության աշխատանքի և զբաղվածության բաժնի ղեկավար Էլզա Ջգերենայան։
Նրա խոսքով՝ այս կերպ պետությունը մտադիր է պաշտպանել Վրաստանի քաղաքացիների շահերը։
