Արցախի Հանրապետության նախագահ Բակո Սահակյանն ապրիլի 17-ին մասնակցել է Պաշտպանության բանակի զորամասերի հրամանատարների և նրանց տեղակալների հավաքին:
Ինչպես հայտնում է նախագահի մամուլի ծառայությունը, նախագահ Սահակյանն իր ելույթում կարևորել է նման հավաքները և դրանց զուգահեռ բազմաստիճան հրամանատարաշտաբային զորավարժությունների անցկացումը պաշտպանության բանակի և հայոց զինված ուժերի համար:
Երկրի ղեկավարի խոսքով` դրանք հնարավորություն են տալիս կատարելագործելու հրամանատարական կազմի տեսական եւ գործնական ունակություններն ու գիտելիքները, ծանոթանալու առաջատար փորձին և այն կիրառելու տեղերում, բարձրացնելու զորամասերի հրամանատարության պատրաստվածությունը, ինչպես նաև շտկելու եղած թերություններն ու բացթողումները:
Նախագահ Սահակյանը կոնկրետ հանձնարարականներ է տվել բանակի հրամանատարությանը ռազմավարական և մարտավարական մի շարք խնդիրների լուծման ուղղությամբ:
