Սթիվեն Սփիլբերգի նոր լրտեսական թրիլլերը, որի նկարահանումներն անցկացվել են Բեռլինում, փոխել է իր աշխատանքային անվանումը՝ St. James Place-ից պաշտոնական Bridge of Spies-ի։ Այս մասին հայտնել է ամերիկյան DreamWorks Pictures ընկերությունը։
Թոմ Հենքսի դերակատարմամբ ֆիլմն էկրաններին կհայտնվի հոկտեմբերին, գրում է Deutsche Welle-ն։
Ստուդիայի տվյալներով՝ երաժշտությունը գրում է Թոմաս Նյումանը։
Ֆիլմը ներկայացնում է ամերիկացի օդաչու Ֆրանսիս Գերի Փաուերսի պատմությունը, ով հետախուզական թռիչքներ է իրականացրել ԽՍՀՄ-ում և խփվել է 1960թ. մայիսի 1-ին Սվերդլովսկում։
Նա դատապարտվել էր 10 տարվա ազատազրկման։ Սակայն կես տարի անց փոխանակվել էր «լրտեսների կամրջի» վրա, ինչպես անվանում էին Գլինիկեի կամուրջը Բեռլինում, խորհրդային լրտես Ռուդոլֆ Աբելի հետ։
