ԻԿՕՄՕՍ կազմակերպության հայաստանյան գրասենյակի նախագահ Գագիկ Գյուրջյանն, այսօր մամուլի ասուլիսին հայտնեց, որ Անիի եկեղեցիների վերականգնողական աշխատանքներին մասնակցելու են նաև հայ մասնագետներ: Նա նշեց, որ ԻԿՕՄՕՍ Հայաստանը դրան հասել է՝ դեռ 2011 թվականին Փարիզում ընդունել տալով այդպիսի բանաձև:
Նա ասաց, որ այսպիսով թուրքական կողմը դիմել է ՀՀ մշակույթի նախարարությանը, որ ներկայացնեն մասնագետների այնպիսի ցանկ, ովքեր կմասնակցեն շինարարական աշխատանքներին:
«Մեկուկես-երկու ամիս անց նոր կսկսվեն վերականգնողական աշխատանքները՝ հաշվի առնելով Անիում եղանակային պայմանները»,- նշեց Գագիկ Գյուրջյանը և ավելացրեց, որ ի տարբերություն նախկինի՝ այժմ միջազգային հսկողությունը և վերականգնողական աշխատանքները բավականին լուրջ հիմքերի վրա են դրված:
Բացի այդ, Գագիկ Գյուրջյանը նկատեց, որ Թուրքիան իր տարածքում գտնվող մշակութային ժառանգությունը մեծապես օգտագործում է տուրիզմի զարգացման համար, ինչի արդյունքում սկսել են ուշադրություն դարձնել հայկական եկեղեցիներին:
«Թուրքիայի տարածքում գտնվող ամենավտանգված հայկական հուշարձանը Մրենի՝ 7-րդ դարով թվագրվող հուշարձանախումբն է»,-ասաց նա և հայտնեց, որ նախորդ տարի Թուրքիայի կողմից ՅՈՒՆԵՍԿՕ-ին ներկայացնելու ցուցակում ընդգրկված է 52 հուշարձան։
Ըստ բանախոսի՝ դրանով նրանք ցույց են տալիս, որ հանդուրժողական վերաբերմունք ունեն բոլոր տեսակի ժառանգությունների նկատմամբ: