Հայաստանում գրիպի համաճարակ չի գրանցվել, իսկ սուր շնչառական հիվանդությունների նոր դեպքերի թիվը կրճատվում է, հինգշաբթի լրագրողներին ասաց ՀՀ առողջապահության նախարար Արմեն Մուրադյանը։
Նրա խոսքով` երկրում գրանցված սուր շնչառական հիվանդությունների դեպքերի թվի աճը համաճարակի առաջացման պատճառ չի դարձել։
«Հիվանդների թիվը պետք է հինգ անգամ գերազանցի համաճարակային շեմը` համաճարակի մասին պաշտոնապես հայտարարելու համար, Հայաստանում այդ շեմը գերազանցվել է 1,5 անգամ, ինչը մտահոգիչ էր։ Իրավիճակը գնահատվել էր որպես բռնկում, և ձեռնարկվել էին համապատասխան միջոցներ», – ասաց Մուրադյանը։
Ինչպես նշեց նախարարը, ընդհանուր առմամբ գրանցվել է 1900 դիմում, 602 մարդ տեղափոխվել է հիվանդանոց։ Հոսպիտալացված հիվանդների ընդհանուր թվից 599–ը 0–18 տարեկան երեխաներ են, որի երեք քառորդը` դպրոցահասակ երեխաներ։ Նա պարզաբանեց, որ այս պատճառով էլ երկարացվել են դպրոցական արձակուրդները։
Հայաստանում դպրոցական արձակուրդները երկարացվել են մեկ շաբաթով` մինչև մարտի 29–ը` հաշվի առնելով գրիպով և ՍՇՀ–ով պայմանավորված հիվանդությունների աճի մասին տեղեկությունները։
«Դպրոցական արձակուրդները երկարացնելու որոշումից հետո հիվանդների դիմելու թիվը կրճատվել է` հասնելով 1400–ի, նկատվում է հիվանդության կտրուկ նվազում, և ես կարծում եմ, որ այդ միտումը կշարունակվի, և առաջիկա օրերին մենք կկարողանանք ասել, որ սպառնալիքը նահանջել է», – ասաց Մուրադյանը։–0–
