Թուրքական Sabah թերթի փոխանցմամբ՝ Թուրքիայի զինված ուժերը երկրի տարածքում Սիրիայից արձակված ականանետի մեկ արկի ընկնելուն պատասխանել են 367 հրետանային հարվածով։
Թերթը նշում է, որ շաբաթ առավոտյան Սիրիայի տարածքից գնդակոծվել է Թուրքիայի տարածքը, ինչին վերջինիս զինված ուժերը պատասխանել են «Ֆըրթընա» (թարգմանաբար՝ «Փոթորիկ») հաուբիցների 261 հարվածով։
Բացի այդ, կիրակի Հաթայ նահանգի տարածքում ընկել է Սիրիայից արձակված ականանետի մեկ արկ, ինչին թուրքական կողմը պատասխանել է «Ֆըրթընայի» ևս 106 հարվածով։
Այդպիսով Թուրքիայի զինված ուժերը երկու օրում 367 հրետանային հարված են հասցրել Սիրիայի քրդերի ուժերի (YPG) 90 օբյեկտների վրա։ Թուրքական կողմի պնդմամբ՝ այդ հարվածների հետևանքով զոհվել է 150 մարդ, որոնցից 62-ը YPG-ի մարտիկներ են։ Բացի այդ, վիրավորվել է YPG-ի ևս 50 մարտիկ։
Երկուշաբթի թուրքական կողմը հասցրել է հրետանային ևս մի քանի հարված, որով և 3 օրում նրա հասցրած հրետանային հարվածների թիվը հասել է մոտ 400-ի, իսկ դրանց թիրախում գտնվող YPG-ի օբյեկտների թիվն անցել է 100-ից։
