Crimenews.am-ը գրում է.
Բոլորին է հայտնի, որ Գ.Կոստանյանի ՀՀ Գլխավոր դատախազ նշանակվելուց հետո սարսափելի կադրային արտահոսք սկսվեց դատախազությունից, բոլոր քիչ թե շատ պրոֆեսիոնալ կադրերը դիմում գրեցին և ինքնակամ դուրս եկան համակարգից:
Շատերը փորձեցին դա ներկայացնել՝ որպես բարեփոխումների արդյունք, որ արդիական մոտեցումներին հները չդիմացան,ի վիճակի չեղան փոփոխվել և այդ պատճառով էլ հեռացան:
Մենք կփորձեինք հավատալ դրան, եթե ականատես չլինեինք կադրային ջարդի հետևանքով դատախազությունում հայտնված կադրերի, մեղմ ասած, ոչ կոմպետենտ գործելաոճին: Այստեղ տեղին է նշել հին ասացվածքը՝ մինչև չգա հետինը, չես հիշի նախորդին:
Այսօր էլ համառորեն լուրեր սկսեցին պտտվել այն մասին, որ Գլխավոր դատախազ Գ.Կոստանյանը որոշել է ևս մեկ փայլուն, մինչ այդ նախադեպը չունեցող կադրային նշանակում կատարել, որը համենայն դեպս ըստ մեր կարծիքի,իր յուրահատկությամբ կմթագնի նախկին բոլոր արտառոց նշանակումները:
Ըստ լուրերի ,ՀՀ Գլխավոր դատախազությունում մոտ մի քանի ամիս է թափուր է պատասխանատու վարչություններից մեկի պետի պաշտոնը: Եվ ըստ լուրերի, Գ.Կոստանյանը փորձում է այդ պատասխանատու պաշտոնին նշանակել ՀՀ Զինվորական դատախազությունում բարձր պաշտոն զբաղեցնող մեկին:
Թվում է ,թե արտառոց ոչինչ չկա,իրոք որ չկա ,եթե չլիներ մի փոքրիկ, բայց էական բայց.
Նախ և առաջ , բոլոր քիչ թե շատ հին աշխատակիցներն այս հավանական նշանակման մասին լուրը լսելուց առաջին 5-րոպեն քարանալուց և մի կերպ խելքի գալուց հետո առաջին հոդաբաշխ խոսքը , որ կարողանում են արտաբերել, հետևյալն է՝ ՛՛Հնարավոր չէ,հո աշխարհի վերջը չէ՞՛՛:
Ավելացնենք նաև, որ մեր հավանական նշանակվողը համակարգում հայտնի է իր տարբեր քաջագործություններով, վերջինս մի տևական ժամանակ, մեղմ ասած, եղել է բոլորի ուրախությունը, իսկ բոլորի մոտ ամենաշատը տպավորված պատմությունը հետևյալն է.
ՀՀ գլխավոր դատախազությունում աշխատելու տարիներին մեր հերոսը մեղադրական եզրակացությամբ քրեական գործ է ուղարկում դատարան,սակայն մեղադրական եզրակացությունում նշված ապացույցներն առանձնացնում է , դնում իր սեյֆում և դատարան չի ուղարկում :Երբ այս ամենը, բնականաբար, դուրս է գալիս ջրի երես ,մեր հերոսը մեկնաբանում է, որ միտումնավոր կերպով մեղադրանքի հիմնավորումները չի ուղարկել դատարան,քանի որ մտավախություն է ունեցել ,որ այդ ապացույցները դատարանում կարող են ոչ ավել,ոչ պակաս, ոչնչացվել:
Եվ այսօր մեր հերոսի համար նախագահականում լոբբինգ է անում անձամբ Գլխավոր դատախազը, որպեսզի նշանակի նրան պատասխանատու պաշտոնում:
Դե Գլխավոր դատախազին նույնպես կարելի է հասկանալ՝ տեսնելով, թե ինչպես են վերջին ժամանակներին առանց ապացույցների մեղադրականներ գրվում և պաշտպանվում դատարաններում և ընդհակառակը՝ ակնհայտ ապացույցներով գործերը կարճվում,ակնհայտ է դառնում այն, որ իրոք Գ.Կոստանյանի համար այս նշանակումը կարևորագույն խնդիր է,որովհետև նման կադրեր ՀՀ -ում այլևս չկան:
Մի խոսքով, մեր հերոսը դատախազության համակարգի ՛՛Վերջին Մոհիկանն է՛՛:
