Գերմանական իշխանությունները կասկածի տակ են դրել Ֆրանսիայի հարավում կործանված Airbus A320 ինքնաթիռի երկրորդ օդաչու Անդրեաս Լյուբիցի բժշկական եզրակացությունը:
Ինչպես տեղեկացնում է РИА Новости լրատվական գործակալությունը, այդ մասին հաղորդել է Գերմանիայի ավիաարդյունաբերության ֆեդերացիայի ղեկավար Կլաուս Պետեր Զիգլոխը:
Բժիշկները Լյուբիցին թռիչքների համար պիտանի էին ճանաչել:
«Երկրորդ օդաչուն առողջ է ճանաչվել, և ոչ մեկ անգամ, այլ բազմիցս: Նա պիտանի է եղել թռիչքների համար»,- հայտարարել է նա:
Պաշտոնյայի խոսքով՝ «ավիաընկերությունները պետք է վստահ լինեն, որ կարելի է վստահել այս եզրակացություններին»:
Գերմանիայի տրանսպորտի նախարար Ալեքսանդր Դոբրինդտը հաղորդել է, որ նոր չափորոշիչներ են գործելու:
«Օդաչուների հոգեբանական առանձնահատկությունները պետք է հատուկ դեր խաղան»,- ասել է նա:
Դոբրինդտը հավելել է, որ իշխանությունները կզբաղվեն օդաչուի խցիկի դռան մեխանիզմի բարելավման հարցով:
Ինչպես ավելի վաղ հայտնել էր Tert.am-ը, Germanwings ավիաընկերության Airbus A320 ինքնաթիռը մարտի 24-ին կործանվել է ֆրանսիական Ալպերում: Բարսելոնայից Դյուսելդորֆ ուղևորվող ինքնաթիռում եղել է 150 մարդ։
