Այսօր Հիմնադիր խորհրդարանի Քարտուղարության անդամ Գևորգ Սաֆարյանին է այցելել նրա փաստաբաններից Կարապետ Բադալյանը:
Ինչպես արդեն հայտնել էինք, Գևորգ Սաֆարյանը երեկվանից հացադուլ էր հայտարարել իր նկատմամբ քաղաքական հետապնդում իրականացնելու և իրեն ապօրինաբար անազատության մեջ պահելու համար: Գևորգ Սաֆարյանը երեկ երեկոյան տեղափոխվել է հացադուլ հայտարարած անձանց համար նախատեսված խուց:
Նշենք, որ Գևորգ Սաֆարյանը օրեր առաջ ուներ նաև բժշկի այցելության անհրաժեշտություն, որին համապատասխան պատշաճ արձագանք չէր եղել քրեակատարողական հիմնարկի ղեկավարության կողմից: Հիշեցնենք նաև, որ իրավապաշտպան դիտորդական խումբը ևս մոնիթորինգ է իրականացնում Գևորգ Սաֆարյանի գործի նկատմամբ:
Հիմնադիր խորհրդարանը հրավիրում է տեղական և միջազգային իրավապաշտպան կառույցների և դիտորդական առաքելությունների ուշադրությունը Գևորգ Սաֆարյանի գործի վրա՝ բացառելու և կանխարգելելու համար նրա նկատմամբ հնարավոր քաղաքական, հոգեբանական կամ ֆիզիկական ճնշումները:
