Հայաստանում կառավարության որոշմամբ ներկայումս տրանսպորտային միջոցների համարանիշերում օգտագործվում են միայն «A», «C», «D», «F», «L», «M», «N», «O», «P», «Q», «R», «S», «T», «U», «V» և «Z» տառերը: Կառավարության պաշտոնական կայքից տեղեկանում ենք, որ Կառավարության մարտի 10-ի նիստում ՀՀ ոստիկանության պետ Վլադիմիր Գասպարյանը կներկայացնի որոշման նախագիծ, որով առաջարկվում է օգտագործել նաև «G» և «X» տառերը:
Նախագծի տեղեկանք-հիմնավորման համաձայն, որոշման ընդունման անհրաժեշտությունը պայմանավորված է այն հանգամանքով, որ գնալով նվազում է մեծ պահանջարկ ունեցող հաշվառման համարանիշեր ձեռք բերելու պահանջարկը, քանի որ գործող որոշմամբ սահմանված տառեր պարունակող և հետաքրքրություն ներկայացնող համարանիշերը գրեթե սպառվել են:
Ակնկալվում է, որ որոշման նախագծի ընդունման դեպքում կբարձրանա մեծ պահանջարկ ունեցող հաշվառման համարանիշեր ձեռք բերելու պահանջարկը:
Հաստատվելու դեպքում, որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
