Հայկական լրատվական շաբաթը մեկնարկեց Համաշխարհային բանկի «Հայաստան. ամենամսյա տնտեսական տեղեկագր»-ում տեղ գտած կանխատեսմամբ, ըստ որի 2016թ.ին Հայաստանի տնտեսական աճը կշարունակի մնալ դանդաղ՝ 2,5%ի սահմաններում՝ պայմանավորված Ռուսաստանի տնտեսական անկմամբ և կառուցվածքային թուլություններով։
Շաբաթվա կարևոր ու կիզակետային իրադարձություն կարող ենք առանձնացնել կանանց միամսյակի մեկնարկը, որի սկիզբը տրվում է Կանանց միջազգային օրով՝ մարտի 8-ին:
Տոնի պատմությունն ավանդաբար կապվում է Կլարա Ցետկինի անվան հետ, ով ստեղծել էր կանանցից կազմած հեղափոխական ջոկատ: Որոշվում է ընտրել մի օր, որը կհամարվեր կանանց պրոլետարիատի ծննդյան օրը:
1965-ից Խորհրդային Միությունում օրը համարվեց ոչ աշխատանքային: 1975-ին խորհրդային գաղափարախոսներին հաջողվեց հասնել նրան, որ ՄԱԿ-ը 1975-ը ճանաչեց Կանանց միջազգային տարի, որից հետո նույն կառույցը 1977-ին մարտի 8-ն արդեն հայտարարեց Կանանց միջազգային տոն:
Հայաստանում փորձեցին մարտի 8-ը հանել տոնացույցից, և որպես այլընտրանք ապրիլի 7-ը հռչակվեց Մայրության և գեղեցկության օր, սակայն մարտի 8-ն այնքան խոր արմատներ էր գցել և դարձել հայերի սիրված տոներից, որ արդեն ձևավորված ավանդույթին հակառակ գնալն անիմաստ էր, և մարտի 8-ը վերականգնվեց: Ավելին՝ մարտի 8-ից ապրիլի 7-ը ոչ պաշտոնապես մեզանում համարվում է կանանց միամսյակ:
Մարտի 8-ի առթիվ շնորհավորական ուղերձներ հղեցին ՀՀ նախագահ Սերժ Սարգսյանը , Ամենայն հայոց կաթողիկոսը Գարեգին 2-րդը, բարձրաստիճան այլ անձինք:
Մարտի 8-ի առթիվ, 35-ամյա հայուհի Քիմ Քարդաշյանն իր Instagram–ում նոր լուսանկար էր հրապարակել, որտեղ ներկայացել է լրիվ մերկ՝ լուսանկարին կցելով «ազատված» հեշթեգը, որը փոթորիկ առաջացրեց ոչ միայն հայկական լրատվական դաշտում, այլև ամբողջ աշխարհում:
Մարտի 8-ը Արցախյան ազատամարտի հերոս Վարդան Ստեփանյանի (Դուշման Վարդան) ծննդյան տարեդարձն էր: Որի կապակցությամբ հերոսի հարազատները, մի խումբ ազատամարտիկներ, երիտասարդական կազմակերպությունների ներկայացուցիչներ Եռաբլուր զինվորական պանթեոնում հարգանքի տուրք մատուցեցին նրա հիշատակին:
Հերոսի հիշատակի օրվա հետ կապված ՀՀ նախագահ Սերժ Սարգսյանն այցելեց նրա տուն թանգարան:
Մարտի 9-ին, ԵԱՀԿ Մինսկի խմբի ամերիկացի համանախագահ Ջեյմս Ուորլիքը Twitter-ի իր միկրոբլոգում գրել էր, որ Թբիլիսիում քննարկելու են Լեռնային Ղարաբաղի հակամարտությունն ու խաղաղ կարգավորման գործընթացը:
Analitik.am-ը այդ հանդիպման հետ կապված զրուցել էր քաղաքագետ Սերգեյ Մինասյանի հետ, ով հայկական կողմից մասնակցել էր քննարկմանը: Տեղեկացանք, որ հանդիպումը փակ ֆորմատով է անցկացվել և ըստ պայմանավորվածության քննարկման առարկան հրապարակման ենթակա չէ:
Սերգեյ Մինասյանը հայտնեց, որ քննարկմանը մասնակցել են փորձագետներ Հայաստանից, Արցախից և Ադրբեջանից:
Շաբաթվա ընթացքում ՀՀ Նախագահ Սերժ Սարգսյանն աշխատանքային այցով մեկնեց Մոսկվայում։
ՀՀ արտգործնախարար Էդվարդ Նալբանդյանը մինչև ՀՀ և ՌԴ նախագահների հանդիպումը ՛՛Коммерсант՛՛ պարբերականին տված հարցազրույցում ասել էր Լեռնային Ղարաբաղի շուրջ իրավիճակի վատթարացման պատճառների և խնդրի կարգավորման հեռանկարների մասին։
Այնուհետև կայացավ նախագահ Սերժ Սարգսյանի մարտի 10-ին աշխատանքային այցը Ռուսաստանի Դաշնություն:
Մոսկվայում ՀՀ Նախագահը հանդիպում ունեցավ ՌԴ Նախագահ Վլադիմիր Պուտինի հետ: Ինչպես նաև Մոսկվայում ՀՀ Նախագահ, Հայաստանի շախմատի ֆեդերացիայի նախագահ Սերժ Սարգսյանը մասնակցեց շախմատի աշխարհի չեմպիոնի կոչման հավակնորդների մրցաշարի բացման հանդիսավոր արարողությանը:
Այս շաբաթ ևս ազատումները շարունակվեցին ՀՀ ոստիկանությունում. ՀՀ ոստիկանապետ Վլադիմիր Գասպարյանի հրամանով Գյումրի քաղաքի ոստիկանության Մուշի բաժին պետ Խորեն Բարխոյանն ազատվեց պաշտոնից:
ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանը Բիրմինգեմում հանդիպեց Մայքլ Ջեքսոնի հետ:
Պաշտոնական այս հաղորդագրությունը տարաբնույթ հումորային մեկնաբանությունների տեղիք տվեց, սակայն իրականում Մայքլ Ջեքսոնն Անգլիայի Բարձր Դատարանի հարկադիր կատարման ասոցիացիայի նախագահն է:
Այս շաբաթ ևս շարունակեցին դաշնակցականները իրենց քաղաքական որոշման պտուղները քաղել: ՀՀԿ-ՀՅԴ քաղաքական համաձայնագրի շրջանակներում նախագահ Սերժ Սարգսյանի հրամանագրով Արա Նռանյանը նշանակվեց ՀՀ վերահսկիչ պալատի նախագահի տեղակալ:
Անցած շաբաթ ԲՀԿ կուսակցության շուրջ սկսված խառնաշփոթը հասավ իր գագաթնակետին և ԲՀԿ-ական պատգամավոր Վահան Բաբայանը հայտարարեց կուսակցությունից հեռանալու մասին:
Հայաստանում շաբաթը շարունակում էր հագեցված աշխատանքային մթնոլորտում: Մասնավորապես ՀԱՊԿ խորհրդարանական վեհաժողովի խորհրդի արտագնա նիստն անցկացվեց Հայաստանում և խորհրդի նախագահ Սերգեյ Նարիշկինը և նրա գլխավորած պատվիրակության անդամները Երևան ժամանելուն պես այցելեցին Ծիծեռնակաբերդ:Այնուհետև մի շարք հանդիպումներ ունեցան տարբեր բարձրաստիճան անձանց հետ:
Հայաստանում թիվ մեկ քաղաքական օրակարգային հարցի՝ Ընտրական օրենսգրքի նախագծի քննարկման շուրջ Analitik.am-ը զրուցեց «Լուսավոր Հայաստան» կուսակցության խորհրդի անդամ Գրիգորի Դոխոյանի հետ, ով կարծում է, որ «Խնդիրն այստեղ Հայաստանի բաժանումն է 13 ընտրատարածքի, որտեղ մարզերն են և Երևանը՝ բաժանված 4 մասերի, իսկ Սյունիքն ու Վայոց ձորը միացվել են, որտեղ յուրաքանչյուր կուսակցություն պետք է ներկայացնի առանձին ցուցակ, ինչը նշանակում է, որ եթե առաջ Ազգային ժողովը ձևավորվում էր 41 մեծամասնական պատգամավորով, ապա հիմա 100 տոկոս ձևավորվելու է մեծամասնականի շնորհիվ, այդ բոլոր տեղամասերում իշխանությունն առաջադրելու է երկու կամ երեք քրեաօլիգարխիկ անդամների և պայքարը գնալու է ոչ թե գաղափարների մեջ, այլ թե ով ում ինչ լավություն արեցի սկզբունքով»:
Հայաստան-Ռուսաստան հարաբերությունների և Նախագահ Սերժ Սարգսյանի Մոսկվա կատարած այցի վերաբերյալ Analitik.am-ի հետ զրույցում քաղաքական գիտությունների դոկտոր, պրոֆեսոր Լևոն Շիրինյանը հայտարարեց, որ թուրքերի պահանջով ռուսները Նախիջևանը նվիրաբերեցին Ադրբեջանին՝ գրավելով Հայաստանից և հիմա ժամանակն է հետ բերել այն:
Ցավոք սրտի շաբաթը ողբերգական ավարտ ունեցավ: ՊԲ արեւելյան ուղղությամբ տեղակայված զորամասերից մեկի պահպանության տեղամասում նռնակի պայթյունից մահացու վիրավորում ստացավ ՊԲ զինծառայող, 1997թ. ծնված Սարգիս Դավիթի Օհանյանը:
Շաբաթը թեժ էր նաև «Անալիտիկ» մամուլի ակումբում: ՀՀ Պետական Կառավարման ակադեմիայի գիտաշխատող, Վրաստանի հարցերով փորձագետ Ջոնի Մելիքյանը հայտարարեց, որ «Ադրբեջանն ի վնաս իրեն կգնի Ռուսաստանից գազ և կտա այդ ամենը Վրաստանին, փորձելով պահպանել մոնոպոլիան Վրաստանում, որի մասին ոչ ոք չի խոսում, սակայն ընտրություններից հետո դիվերսիֆիկացիան կսկսվի»:
Նարկոլոգիական հանրապետական կենտրոնի դիսպենսերային բաժնի վարիչ Արտաշես Թումանյանն էլ նշեց, որ Հայաստանում՝ մասնավորապես երիտասարդության շրջանում լայն տարածում են գտել թմրանյութերը: Դրանց որոշ տեսակներ, որոնք նոր են սկսել տարածվել ՀՀ-ում ահռելի վնաս են հասցնում օրգանիզմին. «Սփայս» տեսակի թմրանյութեր օգտագործողների մոտ հոգեկան շեղումներ են առաջանում, իսկ «Կրոկոդիլ» տեսակի թմրանյութն էլ ամբողջովին քայքայում է օրգանիզմը՝ առաջացնելով անգամ փտախտ:
