Թեպետ խոստացել էինք չպատասխանել xnews.am-ի մտքի գոհարներին, սակայն այս մի նյութը գոհար չէր, այլ ադամանդ, և հստակ երևում է, որ ճնշման տակ դարձել է ավելի «ջինջ, մաքուր և շողշողուն»: Այդ պատճառով էլ մենք մեզ թույլ չենք տալիս ինչ-որ բան փոփոխել, և այն ներկայացնում ենք հանրությանն առանց փոփոխելու:
Այսպես`
«Xnews.am vs Analitik.am
analitik.am-ի գրած այն ապուշությանը, թե մեր խմբագրությունը կարող է կապ ունենալ ինչ- որ պատգամավորների կամ կուսակցությունների հետ, կամ իբրև թե մեզ կարող է հուզել, թե ում մասին ինչ նյութեր են գրում, պատասխանում ենք հետևյալ կերպ.
Ձեր ակնարկները կարող եք մտցնել ձեր պահոցը ու ամուր պահել:
Բացարձակապես թքած ունենք թե ում, կամ ինչի մասին եք դուք գրում: Մեր խմբագրությանը չի հուզել ու չի հուզում, թե որ կուսակցության, թե որ անձի մասին ինչ եք դուք փորձում գրել: Հայտնում ենք ձեզ ու ձեր տերերին, որ շուտով պատասխանատվության պահն է գալու: Կհանդիպենք դատարանում»:
Հուզմունքից միակ բանը, որ կարող ենք ասել՝ Թումանյանն ու Տերյանը քնած են:
Սակայն, այս իշխանության ձգտող, կրթված, համեստ, ժողովրդի հոգսով տառապող, անձնուրաց, վսեմ, հայեցի…..ուղղակի հուզմունքից աչքերս արցունքոտվեցին ….. ԲՀԿ կուսակցության ջահել պատգամավոր Ուրիխանյանի կայքը մոռացել է մի բան, որ մենք ապրում ենք ՀՀ-ում, ոչ թե Ավստրալիայում, իսկ ջայլամները հիմնականում ազատ շրջում են այնտեղ: ՀՀ-ում նրանք ապրում են Հոկտեմբերյանում գտնվող մի ֆերմայում՝ ցանկապատված տարածքում,պարտադիր հսկողության տակ:
Xnews-ում հավաքված ՀՀ քաղաքացիները կհարցնեն, թե ի՞նչ կապ ունի ջայլամն իրենց ազնիվ, չվաճառվող, արդար կայքի հետ:
Ասեմ՝ իրենց մարգարտաշար անոնսում մեր ընդիմադիրները ապուշություն են անվանում այն իրողությունը, որ իրենք կապ ունեն կուսակցության կամ պատգամավորի հետ:
Այսպես՝ վերադառնանք ջայլամներին.
xnews.am կայքը գրանցվել է 23.05.2014թ-ին, գրանցման դիմած ընկերությունը կոչվում է «Էկոնոմ սերվիս» ՍՊԸ, գրանցման ժամանակ ներկայացվել է 055-83-03-** հեռախոսահամարը, որը, մեր ունեցած տեղեկությունների համաձայն պատկանում է Տիգրան Ուրիխանյանի օգնական Վարդան Քոչարյանին:
Ուշադրություն՝ «Էկոնոմ սերվիս» ՍՊԸ-ի հիմնադիրներն են Արսեն Կարապետի Մկրտչյանը՝ ԲՀԿ համամասնական ցուցակի 148 համար,և Կատերինա Ալեքսանդրի Չերկաշինան՝ ազգությամբ ուկրաինուհի, ԲՀԿ պատգամավոր Տիգրան Ուրիխանյանի կինը, ում հետ վերջինս ամուսնացավ 15.03.2014 թ-ին:
Ամենահասարակ մարդուն էլ պարզ է, որ ջայլամները դուրս են պրծել ցանկապատից և կորցրել են իրենց տիրոջը: Սակայն, հիմք ընդունելով կայքի հավաստիացումը, որ իրենք կապ չունեն ո՛չ պատգամավորի, ո՛չ էլ կուսակցության հետ, ապա դուրս է գալիս որ, ըստ իրենց, ԲՀԿ-ն կուսակցություն չէ, Ուիխանյանն էլ պատգամավոր չէ:
Այստեղ մենք կհամարձակվենք մի փոքր անհամաձայնություն ցուցաբերել՝ ԲՀԿ-ն կուսակցություն է, այ բայց Որիխանյանը, երևի թե կայքը ճիշտ է, այսքանից հետո էլ պատգամավոր չէ:
Հ.Գ. Ի դեպ, կայքը պնդում է, որ պատկանում է ՀՀ քաղաքացիներին, սակայն, սեփականատերերից մեկը՝ Կատերինա Չերկաշինան Ուկրաինայի քաղաքացի է: Ինչևէ, գուցե կայքը որդեգրել է ԲՀԿ-ի ետևում կանգնած ուժերի հայտնի «Իմ կուսակցությունն իմ ժողովուրդն է» ասացվածքը որպես կարգախոս:
Առաջին անգամ ենք լսում, որ անձին կարելի է դատի տալ իրենց հայհոյանքով չպատասխանելու և իրենց մակարդակին չիջնելու համար: Ավելացնենք նաև, որ, եթե կայքը ցանկություն ունի թքելու իր տիրոջ դեմքին, քավ լիցի, դա իր սահմանադրական իրավունքն է, բայց այդ դեպքում հարց է առաջանում՝ ինչո՞ւ մեր միջոցով:
